काठमाडौं । उत्तरी साइप्रसको तटीय क्षेत्रमा निजी यात्रुवाहक फेरी डुब्दा कम्तीमा आठजनाको मृत्यु भएको छ भने १८ जना अझै बेपत्ता छन् ।

बीबीसीका अनुसार फेरीमा २५९ जना यात्रु र चालक दलका आठ सदस्य गरी कुल २६७ जना सवार थिए ।

उत्तरी साइप्रसका प्रधानमन्त्री उनाल उस्टेलका अनुसार पर्यटकीय सहर किरेनियाबाट टर्कीतर्फ प्रस्थान गरेको केही समयमै फेरीमा पानी पस्न थालेपछि दुर्घटना भएको हो ।

खराब मौसमका कारण शनिबार नै प्रस्थान गर्नुपर्ने फेरी आइतबार मात्र समुद्रमा गएको थियो । समुद्रमा दुईवटा शक्तिशाली छालले फेरीलाई ठक्कर दिएपछि त्यसमा पानी पसेर पल्टिएको प्रधानमन्त्री उस्टेलले बताएका छन् ।

दुर्घटनापछि उद्धार तथा खोजी कार्य जारी रहेको छ । बेपत्ताको खोजीका साथै दुर्घटनाको कारणबारे अनुसन्धानसमेत अघि बढाइएको छ ।

बीबीसीका अनुसार घटनाको अनुसन्धानका क्रममा फेरीका कप्तान र चालक दलका अन्य सात सदस्यलाई नियन्त्रणमा लिइएको छ ।

Originally published on abcnews.com.np.