बागलुङ । सशस्त्र द्वन्द्वका क्रममा राज्य र विद्रोही पक्षबाट बेपत्ता पारिएका नागरिकको सम्झनामा आइतबार बागलुङमा बेपत्ता दिवस मनाइएको छ। द्वन्द्वपीडित समाज बागलुङको आयोजनामा साँझ दीप प्रज्वलन तथा प्रवचन कार्यक्रम गरी बेपत्ता नागरिकको सम्झना गरिएको हो। कार्यक्रममा द्वन्द्वपीडित समाजका केन्द्रीय उपाध्यक्ष बद्रीबहादुर केसीले राज्य उत्तरदायी नभएसम्म बेपत्ता नागरिकका परिवारको समस्या समाधान हुन नसक्ने बताए। उनले बेपत्ता नागरिकको अवस्था सार्वजनिक गर्न, पीडितको यथार्थ तथ्यांक राख्न तथा द्वन्द्वमा राज्य वा विद्रोही पक्षमा संलग्न नभए पनि पीडित बनेकाहरूलाई सम्बोधन गर्न सरकारसँग माग गरे। एड्भोकेसी फोरमका अनुसार सशस्त्र द्वन्द्वका क्रममा बेपत्ता भएका १ हजार २४८ जना नागरिक अझै फेला परेका छैनन्। उनीहरूका परिवारजन वर्षौंदेखि आफन्त फर्किने आशामा बसिरहेका छन्। कार्यक्रममा अधिवक्ता राम शर्मा, नेपाल रेडक्रस सोसाइटीका उपाध्यक्ष राजेन्द्र आचार्यसहित अधिकारकर्मी तथा द्वन्द्वपीडित परिवारका सदस्यहरूको सहभागिता थियो। हरेक वर्ष अगस्ट ३० लाई अन्तर्राष्ट्रिय बेपत्ता दिवसका रूपमा मनाउने गरिन्छ।

Originally published on abcnews.com.np.