काठमाडौं । रसुवा पुग्ने वैकल्पिक सडक निर्माण तथा स्तरोन्नतिको कामलाई तीव्रता दिन बागमती प्रदेशका मुख्यमन्त्री किरण थापा मगर आफैँ फिल्डमा खटिएका छन् ।

सोमबार बिहानैदेखि मुख्यमन्त्री मगर चोगटे–सरमथली–जीरोकिलो हुँदै रसुवा जोड्ने वैकल्पिक सडकमा पुगेका हुन् । उनले सडकमा देखिएका समस्या पहिचान तथा समाधान गर्दै निर्माण कार्यको स्थलगत अनुगमन गरिरहेका छन् ।

मुख्यमन्त्री मगरले सडक फराकिलो बनाउने तथा आवतजावत सहज हुने गरी स्तरोन्नतिको कामको अनुगमन गरेका छन् । सडक निर्माणका क्रममा देखिएका अवरोध तत्काल हटाएर कामलाई तीव्र गतिमा अघि बढाउन सम्बन्धित निकायलाई निर्देशनसमेत दिइएको उनले बताए ।

रसुवामा बाढीपछि मुख्य सडक तथा यातायात पूर्वाधारमा क्षति पुगेकाले वैकल्पिक मार्गलाई तत्काल सञ्चालनयोग्य बनाउनु प्रदेश सरकारको प्राथमिकतामा रहेको मुख्यमन्त्री मगरले बताए । राहत तथा अत्यावश्यक सामग्रीको ओसारपसार र नागरिकको आवतजावत सहज बनाउन सडक स्तरोन्नतिको काम अघि बढाइएको उनको भनाइ छ ।

नागरिकलाई सहज र सुरक्षित यात्रा सुनिश्चित गर्न आफू फिल्डमै पुगेर कामको अवस्था बुझिरहेको मुख्यमन्त्री मगरले बताए ।

“जनताको सहज यात्रा र सुरक्षित भविष्यका लागि काम निरन्तर जारी छ,” उनले भने, “सडक निर्माणमा देखिएका समस्या समाधान गर्दै कामलाई गति दिइरहेका छौँ । सडक सुचारु गर्न सकियो भने उद्धार र राहत वितरणमा पनि सहज हुन्छ भन्ने अपेक्षा छ ।”

Originally published on abcnews.com.np.