काठमाडौं । ४२ जना सम्पर्कविहीन रहेको माथिल्लो त्रिशूली–३ ‘ए’ जलविद्युत् आयोजना क्षेत्रमा उद्धार कार्यलाई तीव्र बनाउन गृहमन्त्री सुधन गुरुङ आवश्यक उपकरणसहित घटनास्थलतर्फ अघि बढेका छन्। गृहमन्त्री गुरुङ ‘ब्रेकर’सहित आयोजनास्थल पुग्दैछन्। उनीसँगै भारतीय उद्धार टोली पनि घटनास्थलतर्फ गएको जनाइएको छ। स्थलगत जानकारीअनुसार उद्धार टोली मुख्य पहुँच सुरुङको ‘क्राउन’ भागसम्म पुगेको छ। तर सुरुङभित्र प्रवेश गर्ने मार्गमा रहेको अवरोध पूर्णरूपमा हटाउन नसक्दा उद्धार कार्य प्रभावित भएको छ। अवरोध हटाएर सुरुङभित्र प्रवेश गर्ने प्रयास भइरहेको छ। यसका लागि थप उपकरण तथा प्राविधिक सहयोग आवश्यक परेपछि गृहमन्त्री गुरुङ उपकरणसहित घटनास्थलतर्फ गएका हुन्। सुरुङभित्र रहेका व्यक्तिसम्म पुग्न यसअघि ब्लास्टिङसमेत गरिएको थियो। तर त्यसबाट पनि अवरोध पूर्णरूपमा हट्न नसकेको बताइएको छ। अहिले थप उपकरण प्रयोग गरी प्रवेशमार्ग खोल्ने प्रयास भइरहेको छ।

Originally published on abcnews.com.np.