काठमाडौं । रसुवाको भोटेकोसी नदीमा आएको विनाशकारी बाढीले जलमापन केन्द्रहरू बगाएपछि बाढीको पूर्वानुमान तथा पूर्वसूचना संकलन कार्य चुनौतीपूर्ण बनेको जलविज्ञान तथा जलस्रोत अनुसन्धान केन्द्रअन्तर्गतको बाढी पूर्वानुमान महाशाखाले जनाएको छ।

महाशाखाका बाढीविद् विनोद पराजुलीका अनुसार बाढीले सीमा क्षेत्रमा रहेका जलमापन केन्द्रहरू बगाएपछि तत्कालका लागि सीसी क्यामेरा जडान गरेर नदीको अवस्थाबारे सूचना संकलन गर्ने तयारी भइरहेको छ।

पराजुलीका अनुसार सम्भावित स्थानमा सीसी क्यामेरा जडान गर्न आइतबार नै एउटा टोली त्यसतर्फ पठाइएको छ। तत्कालका लागि कम्तीमा दुईवटा सीसी क्यामेरा राख्ने योजना रहेको उनले बताए।

“त्यो भयो भने हामी दिनरात यहाँ कन्ट्रोल रुममा बसेर सीसी क्यामेरामार्फत प्राप्त तस्बिरहरू अध्ययन गर्दै सूचना दिन सक्नेछौँ,” पराजुलीले रासससँगको अन्तर्वार्तामा भने।

स्वचालित उपकरण तत्काल राख्न कठिन

बाढीले पुललगायतका संरचना बगाउनुका साथै प्रभावित क्षेत्रमा दलदल र हिलो रहेकाले नदीको पानीको बहाव मापन गर्ने स्वचालित उपकरण तत्कालै पुनः जडान गर्न कठिन रहेको महाशाखाले जनाएको छ।

पराजुलीका अनुसार अहिलेको भौगोलिक अवस्थाका कारण प्राविधिक टोलीलाई प्रभावित क्षेत्रमा पुगेर नयाँ जलमापन केन्द्र स्थापना गर्नसमेत समस्या भइरहेको छ।

उनले भने, “पुलहरू बगेका छन्, जमिनमा दलदल र हिलो छ। त्यहाँ गएर तत्काल पुनः अर्को केन्द्र राख्न सक्ने अवस्था छैन।”

जलमापन केन्द्रहरू नै क्षतिग्रस्त भएपछि नदीको वास्तविक बहाव र पानीको सतहसम्बन्धी तथ्यांक नियमित रूपमा प्राप्त गर्न कठिन भएको छ। यस्तो अवस्थामा सीसी क्यामेराबाट प्राप्त दृश्यलाई विश्लेषण गरेर बाढीको सम्भावित जोखिमबारे सूचना प्रवाह गर्ने वैकल्पिक व्यवस्था अपनाउन लागिएको महाशाखाले जनाएको छ।

Originally published on abcnews.com.np.