काठमाडौं । रसुवामा आएको विनाशकारी बाढीपछि फेला परेका तर पहिचान हुन नसकेका शवको पहिचानका लागि चीनले नेपाललाई प्राविधिक सहयोग गर्ने भएको छ। चीनले डीएनए पहिचानसम्बन्धी विज्ञसहित परीक्षण उपकरण र आवश्यक सामग्री नेपाल पठाउने तयारी गरेको हो।

चिनियाँ विदेश मन्त्रालयका प्रवक्ता गुओ जियाकुनले मंगलबार नियमित पत्रकार सम्मेलनमा चीनले नेपाललाई डीएनए परीक्षण उपकरण तथा रिएजेन्ट, ड्रोन, जलशुद्धीकरण उपकरण, प्रकाश उपकरणलगायत अत्यावश्यक सामग्री उपलब्ध गराउने जानकारी दिएका हुन्।

उनका अनुसार चिनियाँ डीएनए पहिचान विज्ञहरू पनि विपद् प्रभावित क्षेत्रमा पुगेर नेपाली विज्ञसँग सहकार्य गर्नेछन्।

बाढीपछि नदी तथा पहिरोबाट लामो समयसम्म प्रभावित भएका कारण धेरै शवको प्राकृतिक स्वरूपमा परिवर्तन आएको छ। कतिपय शव क्षतविक्षत अवस्थामा भेटिएकाले आफन्तबाट प्रत्यक्ष पहिचान गर्न कठिन भइरहेको छ। यस्तो अवस्थामा डीएनए परीक्षण शव पहिचानको महत्वपूर्ण माध्यमबनेको छ। नेपाल प्रहरीले समेत सम्पर्कविहीन व्यक्तिका प्रथम श्रेणीका आफन्तबाट डीएनए नमुना संकलन गर्न आग्रह गरिसकेको छ।

नेपालमा पहिचान हुन नसकेका शवको संख्या बढ्दै गएपछि शवको डीएनए, औँठाछाप तथा अन्य फरेन्सिक विवरण सुरक्षित राखेर व्यवस्थापन गर्ने काम भइरहेको छ। पछिल्लो विवरणअनुसार उद्धार गरिएका सयौँ शवमध्ये थोरैको मात्रै पहिचान हुन सकेको छ।

चीनको सहयोगअन्तर्गत आउने विज्ञ र उपकरणले शवको डीएनए प्रोफाइलिङ तथा पहिचान प्रक्रिया थप तीव्र बनाउन सहयोग पुग्ने अपेक्षा गरिएको छ। नेपालका अधिकारीहरूले यसअघि नै विभिन्न मित्रराष्ट्रसँग डीएनए परीक्षण किट, फरेन्सिक सहयोग तथा अन्य प्राविधिक सामग्री माग गरेका थिए।

यसैबीच, बाढी तथा पहिरोपछि हजारौँ व्यक्ति अझै सम्पर्कविहीन छन्। मंगलबारको विवरणअनुसार नेपालमा ३ हजार ९ सय १६ जना सम्पर्कविहीनरहेको र मृतकको संख्या ९८७ पुगेको एपीले जनाएको छ। उद्धार तथा खोजी अभियान जारी रहेकाले मृतक र सम्पर्कविहीनको संख्या अझै बढ्न सक्ने अनुमान गरिएको छ।

चीनले डीएनए पहिचान विज्ञ र उपकरण पठाउनुका साथै ड्रोन तथा अन्य उद्धार सामग्री उपलब्ध गराउने सहयोगले रसुवा र आसपासका बाढी प्रभावित क्षेत्रमा जारी खोज तथा पहिचान अभियानलाई थप प्रभावकारी बनाउन मद्दत पुग्ने देखिएको छ।

Originally published on abcnews.com.np.