पोखरा । रसुवाको भोटेकोसीमा भदौ १० गते आएको भीषण बाढीपछि खोज तथा उद्धारका क्रममा फेला परेका र परीक्षण तथा व्यवस्थापनका लागि पोखरा ल्याइएका १०२ शवमध्ये २१ शवको सनाखत भएको छ।

मंगलबार २१ शवको सनाखत गरी सम्बन्धित परिवारलाई बुझाइएको स्थानीय प्रशासनले जनाएको छ।

पहिचान खुल्न नसकेका ७६ शवलाई पोखरा महानगरपालिका–१६, माथिल्लो दीपस्थित सिसौघारीमा सुरक्षित रूपमा व्यवस्थापन गरिएकोजिल्ला प्रशासन कार्यालय कास्कीका सहायक प्रमुख जिल्ला अधिकारी चित्राङ्गत बरालले जानकारी दिए।

पोखरा स्वास्थ्य विज्ञान प्रतिष्ठानको शवगृहमा भने अझै पाँच शव राखिएका छन्। ती शवमध्ये एकभन्दा बढी परिवारले तस्बिर हेरेर आफ्नो आफन्त भएको दाबी गरेपछि थप परीक्षण गर्न बाँकी रहेको प्रशासनले जनाएको छ।

सबै शवको डीएनए नमुना संकलन

लामो समयसम्म शवगृहमा शव राख्दा दुर्गन्ध फैलनुका साथै संक्रमण तथा महामारीको जोखिम बढ्न सक्ने भएकाले पहिचान खुल्न नसकेका शवलाई सुरक्षित रूपमा व्यवस्थापन गरिएको बरालले बताए।

“लामो समय शवगृहमा राख्दा दुर्गन्ध फैलनाका साथै महामारीको जोखिम हुने भएकाले सुरक्षित रूपमा शव व्यवस्थापन गरिएको हो। सबै शवको डीएनए लिएका छौँ। परिवारको डीएनए मिलेको अवस्थामा सम्बन्धित परिवारलाई हस्तान्तरण गर्न सकिन्छ,” उनले भने।

प्रशासनका अनुसार धादिङबाट प्राप्त २२, गोरखाबाट सात, नवलपरासीबाट २५ र तनहुँबाट प्राप्त २२ शव पोखरामा व्यवस्थापन गरिएको हो।

गहिरो खाडलमा प्लास्टिकमा राखेर पुरियो

पहिचान खुल्न नसकेका शवलाई सुरक्षित रूपमा व्यवस्थापन गर्न विशेष सावधानी अपनाइएको प्रशासनले जनाएको छ।

शवलाई गहिरो खाडलमा हावा नछिर्ने प्लास्टिकको झोलामा राखेर सङ्केत नम्बर दिइएको थियो। त्यसपछि माटोले पुरिएको छ।

शव पुरिएको स्थानमा समेत पछि पहिचान गर्न सहज होस् भनेर गमला राखी प्रत्येक शवको सङ्केत नम्बर उल्लेख गरिएको ‘स्ट्यान्ड’ बनाइएको छ।

यसरी व्यवस्थापन गरिएका शवको डीएनए नमुना सुरक्षित राखिएकाले भविष्यमा बेपत्ता व्यक्तिका परिवारसँग डीएनए परीक्षण गर्दा मिलान भएमा शवको पहिचान गरी आवश्यक प्रक्रिया पूरा गरेर परिवारलाई हस्तान्तरण गर्न सकिने प्रशासनले जनाएको छ।

भोटेकोसी बाढीपछि ठूलो संख्यामा मानिस बेपत्ता भएकाले अझै पनि परिवारहरू आफन्तको खोजीमा छन्। पहिचान नखुलेका शवको डीएनए परीक्षण र सम्भावित आफन्तको नमुना मिलानमार्फत सनाखत गर्ने प्रक्रिया अघि बढाइएको छ।

Originally published on abcnews.com.np.