काठमाडौँ । देशका विभिन्न स्थानमा आएको बाढी तथा पहिरोका कारण मुख्य राजमार्ग तथा सडकखण्डमा यातायात प्रभावित भएको छ। नेपाल प्रहरीले बुधबार बिहान ६ः३० बजेसम्म सार्वजनिक गरेको विवरणअनुसार बागमती, गण्डकी, कर्णाली र सुदूरपश्चिम प्रदेशका विभिन्न सडकमा यातायात अवरुद्ध भएको हो।

बागमती प्रदेश

• काभ्रे–बीपी राजमार्ग: सम्भावित बाढीको जोखिमका कारण खुर्कोट–नेपालथोक–काठमाडौँ सडकमा राति साँझ ६ बजेदेखि बिहान ४ बजेसम्म सबै सवारीसाधन सञ्चालनमा रोक लगाइएको छ। बिहान ४ बजेदेखि साँझ ६ बजेसम्म सडकको अवस्था हेरेर यातायात सञ्चालन गरिनेछ।
• रसुवा: उत्तरगया गाउँपालिका–५ खाल्टेमा बाढीका कारण त्रिशूली–मेलुङ–स्याफ्रुबेँसी सडकखण्ड पूर्ण रूपमा अवरुद्ध छ। मुख्य राजमार्ग अर्को सूचना नआएसम्म बन्द गरिएको छ।
• नुवाकोट: बाढी तथा पहिरोका कारण टोखा–छहरे, पासाङल्हामु तथा विदुर–लच्याङ सडकखण्ड प्रभावित छन्। केही सडक पूर्ण रूपमा बन्द छन् भने केहीमा रातिको समयमा सवारी सञ्चालनमा रोक लगाइएको छ।
• धादिङ: पृथ्वी लोकमार्गअन्तर्गत बेनीघाट–रोराङ र गजुरी क्षेत्रमा पहिरोका कारण सडक प्रभावित भएको छ। बेनीघाट–रोराङ क्षेत्रमा भने एकतर्फी यातायात सञ्चालन भइरहेको प्रहरीले जनाएको छ।

अन्य प्रदेश

• लमजुङ, गण्डकी: पहिरोका कारण सडक अवरुद्ध।
• मुगु, कर्णाली: छायाँनाथ रारा नगरपालिका–४ ताल्चामा मुगु–गमगढी सडक पूर्ण रूपमा अवरुद्ध।
• बैतडी, सुदूरपश्चिम: दशरथचन्द नगरपालिका क्षेत्रमा गोठालापानी–झुलाघाट सडकखण्ड पूर्ण रूपमा अवरुद्ध।

प्रहरीले बाढी तथा पहिरोका कारण सडकको अवस्था जुनसुकै बेला परिवर्तन हुन सक्ने भएकाले यात्रामा निस्कनुअघि सम्बन्धित सडकको अवस्था बुझेर मात्र आवागमन गर्न यात्रु तथा चालकलाई आग्रह गरेको छ।

Originally published on abcnews.com.np.