काठमाडौं । कर्णाली शिवराजले नेपाल भलिबल लिग (एनभीएल) पहिलो सिजनका लागि विदेशी खेलाडीको कोटा पूरा गरेको छ ।

टोलीले तेस्रो विदेशी खेलाडीका रूपमा इरानका अपोजिट हिटर अलिरेजा अबालुचलाई भित्र्याएको छ । कर्णालीले यसअघि बेलारुसका आउटसाइड हिटर आर्टसियोम कुड्रासोउ र पोल्यान्डका सेटर एमिलियन स्मेटेकलाई अनुबन्ध गरेको थियो ।

अबालुचले इरान, टर्की, भारत, मंगोलिया, लेबनान, रोमानिया, इराक र ग्रिस क्लबबाट खेलिसकेका छन् ।

कर्णालीको प्रशिक्षकमा चन्द्रबहादुर कुँवर र सहायक प्रशिक्षकमा दीपेन्द्रप्रसाद भट्ट छन् ।

पहल गहतराज मार्की रहेको कर्णालीले अक्सनबाट नृपध्वज बस्नेत, सुरज चुनारा, सनोज चौधरी, विनोद चन्द, सन्दीप लोहार, बलराम गुरुङ र सुनील ठकुल्लालाई भित्र्याएको थियो । टोलीले ‘ट्यालेन्ट हन्ट’ बाट डम्बर बिसीलाई छनोट गरेको छ ।

एनभीएलको पहिलो संस्करण यही भदौ १९ गते (शुक्रबार)देखि त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा हुँदै छ ।

कर्णालीले पहिलो दिन नै अन्नपूर्ण स्पाइक किंग्ससँग खेल्दै प्रतियोगिताको सुरुआत गर्नेछ ।

Originally published on abcnews.com.np.