काठमाडौं । लगातारको वर्षाका कारण देशका विभिन्न जिल्लामा बाढी र पहिरोले सडक तथा राजमार्ग अवरुद्ध भएका छन्। नेपाल प्रहरीले बुधबार बिहान जारी गरेको विवरणअनुसार केही सडकखण्डमा यातायात पूर्ण रूपमा रोकिएको छ भने केही स्थानमा वैकल्पिक मार्गबाट सवारी सञ्चालन गरिएको छ।

धादिङको पृथ्वी राजमार्गअन्तर्गत बेनिघाट रोराङ गाउँपालिका–७ कृष्णभीरमा त्रिशूली नदीले सडक कटान गरेपछि सडक भासिएर यातायात पूर्ण रूपमा ठप्प भएको छ। गजुरी गाउँपालिका–२ परेवाभिरमा पनि बाढीका कारण सडकको तल्लो भाग करिब २० देखि २५ मिटर भासिएपछि यातायात अवरुद्ध भएको प्रहरीले जनाएको छ।

रसुवामा भदौ १० गते आएको विनाशकारी बाढीले पासाङल्हामु राजमार्गको त्रिशूली नदी किनारका अधिकांश भाग कटान गरेपछि राजमार्गमा यातायात पूर्ण रूपमा बन्द छ। स्याफ्रुबेँसी पुग्न काठमाडौं–टोखा–छहरे–विदुर–फलाँटे–चोकदे–लच्याङ–सरमथली–पाच्र्याङ–भोर्ले–कालिकास्थान–स्याउबारी–राम्चे–सोले–धुन्चे हुँदै स्याफ्रुबेँसीसम्मको सिंगल लेन कच्ची सडकलाई वैकल्पिक मार्गका रूपमा प्रयोग गर्न सकिने प्रहरीले जनाएको छ।

नुवाकोटको विदुर–लाच्याङ सडकखण्डमा सूर्यगढी गाउँपालिका–१ लाच्याङ डाँडामा पहिरो खसेपछि सडक अवरुद्ध छ। टोखा–छहरे सडकखण्डमा अत्यावश्यक सेवाका सवारीबाहेक अन्य सवारीसाधनलाई राति १० बजेदेखि बिहान ५ बजेसम्म आवागमनमा रोक लगाइएको छ।

लमजुङको बेँसीसहर–मनाङ सडकखण्डअन्तर्गत बेँसीसहर नगरपालिका–६ खरखरेभिरमा पहिरो खसेपछि सडक पूर्ण रूपमा अवरुद्ध भएको छ। मुगुको नाग्म–गमगढी सडकखण्डमा ढुंगा, माटो र लेदोसहितको पहिरो आएपछि यातायात रोकिएको छ। बैतडीको झुलाघाटस्थित गोठालापानी–झुलाघाट सडकखण्ड पनि पहिरोका कारण अवरुद्ध भएको प्रहरीले जनाएको छ।

इलामको मेची राजमार्गअन्तर्गत राजदुवालीमा वर्षाका कारण सडकमा हिलो जमेर अवरुद्ध भएको सडक भने अहिले साना सवारीसाधनका लागि सञ्चालनमा आएको छ।

मकवानपुरमा भने विभिन्न राजमार्गबाट सवारी सञ्चालनका लागि वैकल्पिक व्यवस्था गरिएको छ। १० चक्कासम्मका मालवाहक तथा ठूला यात्रुवाहक सवारीसाधनलाई काठमाडौं जाँदा त्रिभुवन राजपथ र फर्किँदा कान्ति राजमार्ग प्रयोग गर्न भनिएको छ। १४ सिटभन्दा कम क्षमताका यात्रुवाहक सवारीसाधनका लागि हेटौँडा आउँदा फर्पिङ–फाखेल–कुलेखानी–भीमफेदी तथा काठमाडौं जाँदा भीमफेदी–कुलेखानी–सिस्नेरी–दक्षिणकाली मार्ग तोकिएको छ।

यसैबीच, काभ्रेपलाञ्चोक–सिन्धुली जोड्ने बीपी राजमार्गमा सम्भावित बाढीको जोखिमलाई ध्यानमा राख्दै साँझ ६ बजेदेखि बिहान ४ बजेसम्म सवारीसाधन सञ्चालनमा रोक लगाइएको छ। बिहान ४ बजेदेखि बेलुका ६ बजेसम्म भने यातायात सञ्चालन गर्न दिइनेछ।

प्रहरीले विपद्को समयमा अत्यावश्यक अवस्थामा मात्र यात्रा गर्न, तोकिएको पालोअनुसार सवारी सञ्चालन गर्न, ओभरटेक नगर्न तथा ट्राफिक प्रहरी र सुरक्षाकर्मीको निर्देशन पालना गर्न आग्रह गरेको छ।

Originally published on abcnews.com.np.