काठमाडौं । भोटेकोसी बाढीपछि रसुवा र नुवाकोटका विभिन्न जलविद्युत् आयोजनाका सुरुङ तथा विद्युत् गृहभित्र ४८४ जना फसिरहेको व्यवसायीहरूले बताएका छन् । स्वतन्त्र ऊर्जा उत्पादकहरूको संस्था, नेपाल (इप्पान) का पदाधिकारीका अनुसार सरकारी, निजी तथा विदेशी लगानीमा निर्माण सम्पन्न भएका र निर्माणाधीन ११ जलविद्युत् आयोजनाका सुरुङ तथा विद्युत् गृहभित्र ४८४ जना फसेका छन् । प्राप्त विवरणअनुसार सबैभन्दा बढी माथिल्लो त्रिशूली–१ जलविद्युत् आयोजनाको सुरुङभित्र तीन सय जना अड्किएका छन् । कोरियाली लगानीमा निर्माण भइरहेको २१६ मेगावाट क्षमताको उक्त आयोजनामा कार्यरत ५५७ जना अझै सम्पर्कविहीन रहेको जनाइएको छ । यस्तै, माथिल्लो त्रिशूली–३ ‘बी’ आयोजनामा १२२ जना, माथिल्लो त्रिशूली–३ ‘ए’ मा ४२ जना, रसुवागढीमा १२ जना र चिलिमे जलविद्युत् आयोजनामा आठ जना फसेका छन् । इप्पानका अनुसार ११ वटा आयोजनाबाट सम्पर्कविहीन हुनेको संख्या ९८३ पुगेको छ । जसमध्ये रसुवाका ६ जलविद्युत् आयोजनाबाट ७१० जना र नुवाकोटका पाँच आयोजनाबाट २७३ जना सम्पर्कविहीन रहेको जनाइएको छ ।

Originally published on abcnews.com.np.