काठमाडौं । नेपाली कम्युनिस्ट पार्टी (नेकपा)का संसदीय दलका नेता एवं संयोजक पुष्पकमल दाहाल ‘प्रचण्ड’ले विपद्का बेला सरकारबाट पर्याप्त जनपरिचालन हुन नसकेको बताएका छन्।

बुधबार प्रतिनिधिसभाको बैठकमा बोल्दै प्रचण्डले विपद्को सुरुवाती चरणमा सरकारले सक्रियता देखाए पनि त्यसलाई निरन्तरता दिन नसकेको टिप्पणी गरे। उद्धार तथा राहतका लागि नेपाली सेना परिचालन भए पनि प्रभावित क्षेत्रमा व्यापक रूपमा जनपरिचालन हुन नसकेको उनको भनाइ छ।

‘प्रधानमन्त्री र मन्त्री सक्रिय भएर जाने–आउनेमा त देखियो, सेनाले जोखिम उठाएर उद्धार र राहतमा खेलेको भूमिका पनि देखियो। त्यसका लागि धन्यवाद,’ प्रचण्डले भने, ‘सेना परिचालन भयो, जनपरिचालन भएन। जनपरिचालन नगर्दासम्म समस्याको वास्तविक समाधान हुँदैन।’

उनले विपद् व्यवस्थापनमा सुरक्षा निकायसँगै आम नागरिकलाई पनि परिचालन गर्नुपर्नेमा जोड दिए। स्थानीय तहदेखि केन्द्रसम्मका सरकारी संयन्त्रबीच प्रभावकारी समन्वय आवश्यक रहेको उनले बताए।

‘सेना परिचालनसँगै जनपरिचालन जोडिएन, केन्द्रीयसँगै स्थानीय सरकार जोडिएन भने समस्याको समाधान हुँदैन,’ प्रचण्डले भने।

उनले विपद्को प्रभावकारी सामना गर्न केन्द्र सरकारको नेतृत्वमा स्थानीय सरकार, सुरक्षा निकाय र नागरिकको समन्वय आवश्यक रहेको बताए। प्रभावित क्षेत्रमा तत्काल उद्धार, राहत तथा पुनःस्थापनाका लागि उपलब्ध सबै जनशक्ति र संयन्त्रलाई एकीकृत रूपमा परिचालन गर्नुपर्ने उनको भनाइ थियो।

Originally published on abcnews.com.np.