काठमाडौं । नेकपा (एमाले) संसदीय दलका नेता रामबहादुर थापा ‘बादल’ले रसुवाको भोटेकोसी बाढीबाट उत्पन्न संकट समाधानका लागि सरकारलाई सातवटा सुझाव दिएका छन्।

बुधबार प्रतिनिधिसभा बैठकमा बोल्दै नेता बादलले विपद्को सामना गर्न सरकारको कार्यशैलीमा परिवर्तनदेखि अन्तर्राष्ट्रिय सहयोग परिचालनसम्मका प्रस्ताव अघि सारे।

उनले प्रधानमन्त्रीले एकांकी शासनशैलीमा गुणात्मक परिवर्तन गर्दै संसद्लाई सरकारका गतिविधिबारे निरन्तर जानकारी गराउनुपर्ने बताए।

बादलका सात सुझाव यस्ता छन् :

१. प्रधानमन्त्रीको शासनशैलीमा परिवर्तन
प्रधानमन्त्रीले एकांकी शासनशैलीमा गुणात्मक परिवर्तन गर्नुपर्ने र सरकारका गतिविधिबारे सदनलाई निरन्तर जानकारी गराउनुपर्ने।

२. राष्ट्रिय सहमति र सर्वपक्षीय संयन्त्र
विद्यमान संकटको समाधान राष्ट्रिय सहमतिबाट खोज्नुपर्ने। त्यसका लागि राजनीतिक दल तथा विज्ञहरू सम्मिलित सर्वपक्षीय संयन्त्र गठन गर्नुपर्ने।

३. संसदीय समिति गठन
सभामुखले सरकारलाई सचेत गराउन तथा आवश्यक सहयोग गर्न संसदीय समिति गठन गर्नुपर्ने।

४. अन्तर्राष्ट्रिय सहयोगका लागि विशेष कार्यदल
अन्तर्राष्ट्रिय सहयोग, क्षतिपूर्ति तथा समन्वयका लागि परराष्ट्रमन्त्रीको नेतृत्वमा विशेष कार्यदल गठन गर्नुपर्ने।

५. उद्धार तथा राहतका लागि टास्कफोर्स
उद्धार र राहत कार्यलाई प्रभावकारी बनाउन रक्षामन्त्रीको नेतृत्वमा विशेष टास्कफोर्स गठन गर्नुपर्ने।

६. पुनर्निर्माणका लागि विशेष कार्यदल
विपद्पछिको पुनर्निर्माण तथा पुनःस्थापनाका लागि अर्थमन्त्रीको नेतृत्वमा विशेष कार्यदल गठन गर्नुपर्ने।

७. सगरमाथा संवाद अघि बढाउने
जलवायु परिवर्तनबाट उत्पन्न संकटको सामना तथा अन्तर्राष्ट्रिय ऐक्यबद्धता जुटाउन सगरमाथा संवादको दोस्रो संस्करण अघि बढाउनुपर्ने बादलको सुझाव छ।

बादलले रसुवा बाढीलाई तत्कालीन उद्धार र राहतको विषयमा मात्र सीमित नगरी जलवायु परिवर्तन, पुनर्निर्माण तथा अन्तर्राष्ट्रिय सहयोगको व्यापक दृष्टिकोणबाट सम्बोधन गर्नुपर्ने धारणा राखे।

Originally published on abcnews.com.np.