काठमाडौं । प्रमुख प्रतिपक्षी दलका नेता भीष्मराज आङदेम्बेले विपद्का बेला गृहमन्त्री आफैँ उद्धारमा खटिएको विषयमा प्रश्न उठाएका छन्।

बुधबार प्रतिनिधिसभा बैठकमा भोटेकोसी बाढी र सुरुङमा फसेकाहरूको उद्धारबारे बोल्दै आङदेम्बेले मन्त्रीको व्यक्तिगत रूपमा उद्धारमा खटिएको दृश्यलाई प्रचारको विषय बनाइएको टिप्पणी गरे।

उनले गृहमन्त्री आफैँ प्रभावित क्षेत्रमा पुगेर सुरुङमा उद्धारका लागि खटिएको तस्बिर सामाजिक सञ्जालमा चर्चामा आएको उल्लेख गर्दै त्यसको प्रशंसा पनि गरे। तर, उद्धारजस्तो प्राविधिक काममा मन्त्री स्वयं खटिनुभन्दा विज्ञ तथा प्राविधिक टोली परिचालन गर्नुपर्ने उनको तर्क थियो।

‘एकजना मन्त्रीजी विपद् प्रभावित क्षेत्रमा गएर आफैँ खोस्रिएको फोटोले सर्वत्र प्रशंसा भएको छ। मैले पनि फोटो जुम गरेर हेरेँ, पसिना पनि आएको थियो। फोटो मलाई पनि राम्रो लाग्यो,’ आङदेम्बेले भने।

तर उनले मन्त्रीका परिवारका सदस्य नै सुरुङभित्र फसेको अवस्था भए गृहमन्त्रीले कस्तो भूमिका निर्वाह गर्नुहुन्थ्यो भन्दै प्रश्न गरे।

‘के मन्त्रीजीहरूका परिवारका सदस्य सुरुङभित्र फसेका भए मन्त्रीजी त्यसरी नै आफैँ खोस्रिन जानुहुन्थ्यो कि प्राविधिक र विज्ञसहित जानुहुन्थ्यो?’उनले प्रश्न गरे।

आङदेम्बेले सुरुङमा फसेकाहरूको उद्धारमा सरकारले गम्भीर ढिलाइ गरेको आरोपसमेत लगाए। उनका अनुसार सात दिनसम्म उद्धारका लागि सम्बन्धित पक्षलाई प्रभावकारी रूपमा परिचालन नगरेर सातौँ दिनमा मात्रै आफैँ खोजी गर्न लगाउने निर्णय गैरजिम्मेवार थियो।

‘सात दिनसम्म कसैलाई जान नदिएपछि सातौँ दिन आफैँ खोज भन्ने गैरजिम्मेवार निर्णय सरकारले गर्‍यो,’ उनले भने।

उनले विपद्को समयमा राजनीतिक नेतृत्वले व्यक्तिगत रूपमा उद्धारमा खटिएको देखिनुभन्दा प्राविधिक क्षमता, विशेषज्ञता र प्रभावकारी उद्धार संयन्त्रलाई तत्काल परिचालन गर्नुपर्ने बताए।

Originally published on abcnews.com.np.