काठमाडौं । नेपाली कांग्रेस संसदीय दलका नेता भीष्मराज आङदेम्बेले विपद्का बेला सरकार प्रभावित नागरिकको उद्धारमा भन्दा सामाजिक सञ्जाल र प्रचारमा बढी केन्द्रित भएको आरोप लगाएका छन्।

बुधबार प्रतिनिधिसभा बैठकमा भोटेकोसी बाढीबारे धारणा राख्दै आङदेम्बेले सरकार विपद्को गम्भीरताप्रति संवेदनशील बन्न नसकेको टिप्पणी गरे। उनले जलविद्युत् आयोजनाका सुरुङमा कामदार तथा मजदुर फसेको अवस्थामा सरकारले समयमै खोज तथा उद्धार गर्न नसकेको दाबी गरे।

उद्धारका लागि प्रारम्भिक ७२ घण्टा अत्यन्त महत्वपूर्ण हुने भए पनि सरकारले त्यस अवधिमा पर्याप्त ध्यान नदिएको उनको आरोप छ। उनका अनुसार बाढी आएको सातौँ दिनमा मात्रै सरकारले सम्बन्धित जलविद्युत् आयोजनालाई खोज तथा उद्धारका लागि बोलाएको थियो।

आङदेम्बेले सरकारको ढिलाइ र असंवेदनशीलताका कारण सुरुङभित्र फसेकाहरूको ज्यान गएको भए त्यसको जिम्मेवारी कसले लिने भन्ने प्रश्नसमेत उठाए।

‘सरकारको असंवेदनशीलता र ढिलाइका कारण सुरुङभित्र भएको मृत्यु, मृत्यु हो कि हत्या?’ उनले प्रश्न गरे।

उनले सरकार समयमै बाढी प्रभावित नागरिकसम्म पुग्न नसकेको आरोप लगाए।

‘सरकार सामाजिक सञ्जालमा अल्झियो, जोखिममा परेका समुदायमा समयमा पुगेन,’ आङदेम्बेले भने, ‘सरकार परिणाम दिन र प्राण जोगाउनुभन्दा प्रचार मिलाउन लाग्यो। फिल्डमा भन्दा फेसबुकमा धेरै भयो, हल्लामा लाग्यो।’

आङदेम्बेले विपद्को समयमा सरकारको प्राथमिकता प्रचार नभई उद्धार, राहत र नागरिकको जीवन रक्षा हुनुपर्ने बताए।

Originally published on abcnews.com.np.