काठमाडौं । सत्तारुढ दल राष्ट्रिय स्वतन्त्र पार्टी (रास्वपा)का संसदीय दलका उपनेता गणेश पराजुलीले विपद्का समयमा नेतृत्वको भूमिका आफैँ उद्धारमा दौडिनुभन्दा राज्यका सम्पूर्ण संयन्त्रलाई नागरिकको जीवनरक्षामा केन्द्रित गर्नु रहेको बताउनुभएको छ । बुधबार प्रतिनिधिसभा बैठकमा बोल्दै पराजुलीले संकटका बेला नेतृत्वले तत्काल सही निर्णय गर्ने, आवश्यक जनशक्ति परिचालन गर्ने र अवरोध हटाउने भूमिका निर्वाह गर्नुपर्नेमा जोड दिनुभयो । प्रभावित क्षेत्रमा खटिएका सुरक्षाकर्मी, स्वास्थ्यकर्मी, कर्मचारी तथा स्वयंसेवकले राज्य र नेतृत्व आफ्नो साथमा दृढतापूर्वक उभिएको अनुभूति गर्न सक्नुपर्ने उहाँको भनाइ थियो । “संकटको समयमा नेतृत्वको भूमिका स्वयं सबै काम गर्न दौडिने मात्र होइन । सही ठाउँमा सही निर्णय र व्यक्तिलाई परिचालन गर्ने, आवश्यक निर्णय तत्काल गर्ने, अवरोध हटाउने र सम्पूर्ण संयन्त्रलाई नागरिकको जीवनरक्षामा केन्द्रित गराउने हो,” पराजुलीले भन्नुभयो । उहाँले विपद्का बेला नेतृत्वले कमाण्ड, समन्वय र सञ्चारको श्रृंखला बलियो बनाइराख्नुपर्ने बताउनुभयो । उद्धारमा खटिएका सुरक्षाकर्मी, स्वास्थ्यकर्मी, कर्मचारी र स्वयंसेवकले राज्य र नेतृत्व दृढतापूर्वक आफ्नो पछाडि रहेको अनुभूति गर्नुपर्ने उहाँको भनाइ थियो । “जिम्मेवार नेतृत्वको भूमिका उद्धारकर्मीका लागि साहस, सम्बन्धित निकायका लागि निर्देशन र नागरिकका लागि भरोसा हो,” उहाँले भन्नुभयो । पराजुलीले संकटका बेला पदमा रहनु मात्र नेतृत्व नभई आफ्नो जिम्मेवारी पहिचान गरी त्यसमा अडिग रहँदै प्रत्येक निकायलाई जिम्मेवार र परिणाममुखी ढंगले परिचालन गर्न सक्नु वास्तविक नेतृत्वको परीक्षा भएको बताउनुभयो । उहाँले बाढी प्रभावित क्षेत्रमा खोज तथा उद्धारमा परिचालित सुरक्षाकर्मीप्रति आभारसमेत व्यक्त गर्नुभयो ।

Originally published on abcnews.com.np.