काठमाडौं । रसुवाको भोटेकोसी नदीमा आएको बाढीमा परी मृत्यु भएकाहरूको शव पहिचान तथा व्यवस्थापनमा सघाउन सिंगापुरको विपद् पीडित पहिचान टोली नेपाल आइपुगेको छ।

भदौ १० गते भोटेकोसीमा आएको विनाशकारी बाढीपछि खोज, उद्धार तथा शव पहिचानका लागि विभिन्न मुलुकका फरेन्सिक टोली नेपाल आएका छन्।

परराष्ट्र मन्त्रालयका प्रवक्ता लोकबहादुर पौडेल क्षेत्रीका अनुसार सिंगापुरबाट डीएनए परीक्षण उपकरणसहित थप १३ जना सदस्य बुधबार नेपाल आएका हुन्। यससँगै सिंगापुरको ‘डिजास्टर भिक्टिम आइडेन्टीफिकेसन’ टोलीको सहभागिता थप प्रभावकारी हुने अपेक्षा गरिएको छ।

प्रवक्ता क्षेत्रीका अनुसार बिहीबार उच्च क्षमताका ड्रोन तथा अन्य प्राविधिक सामग्रीसहित थप सदस्यहरू पनि नेपाल आउनेछन्।

भोटेकोसी बाढीपछि भारतबाट आएको १९ सदस्यीय फरेन्सिक टोलीले नेपाल प्रहरीसँगको सहकार्यमा डीएनए नमुना परीक्षण गरिरहेको छ। यस्तै, चीनबाट मंगलबार नेपाल आइपुगेको पाँच सदस्यीय विशेष फरेन्सिक टोलीले पनि डीएनए नमुनाको प्रशोधन तथा विश्लेषणमा नेपाल प्रहरीसँग मिलेर काम सुरु गरिसकेको छ।

दक्षिण कोरियाबाट आवश्यक उपकरण तथा औजारसहित आएको फरेन्सिक टोलीले समेत नेपालमा काम सुरु गरेको छ।

परराष्ट्र मन्त्रालयका प्रवक्ता क्षेत्रीले नेपालभित्र तथा विश्वभर उपलब्ध विशेषज्ञता र स्रोत–साधनको अधिकतम उपयोग गर्दै खोज तथा उद्धारलाई प्रभावकारी बनाउन सरकारले सम्भव भएसम्मका सबै प्रयास गरिरहेको बताएका छन्।

भोटेकोसी बाढीपछि ठूलो संख्यामा मानिस बेपत्ता तथा मृत्यु भएकाले शव पहिचान, डीएनए परीक्षण र परिवारलाई शव हस्तान्तरणको प्रक्रिया सरकारका लागि थप चुनौतीपूर्ण बनेको छ।

Originally published on abcnews.com.np.