काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले रसुवाको भोटेकोसी नदीमा आएको विनाशकारी बाढीपछि सहयोग र ऐक्यबद्धता जनाउने राजनीतिक दलहरूलाई धन्यवाद दिएका छन्।

बिहीबार पार्टी केन्द्रीय कार्यालय वनस्थलीमा बसेको रास्वपा सचिवालय बैठकमा सभापति लामिछानेले भोटेकोसी विपद्का बेला विभिन्न राजनीतिक दलबाट प्राप्त सहयोग तथा ऐक्यबद्धताप्रति आभार व्यक्त गरेका हुन्।

रास्वपा प्रवक्ता जगदीश खरेलका अनुसार लामिछानेले यसअघि भएको सर्वदलीय बैठकमा भएका छलफल र त्यसबाट निस्किएका निष्कर्षबारे सचिवालय सदस्यहरूलाई जानकारी गराएका थिए।

“सर्वदलीय बैठकमा भएका छलफल र निष्कर्षका बारे पार्टीमा ब्रिफिङ गर्नुभयो। राजनीतिक पार्टीबाट भएको ऐक्यबद्धताका लागि धन्यवाद दिनुभयो।”

‘विपद्मा दलहरूबीच समन्वय आवश्यक’

लामिछानेले विपद्को समयमा राजनीतिक दलहरूबीच आपसी समन्वय र सहकार्य आवश्यक रहेको धारणा राखेका छन्।

प्रवक्ता खरेलका अनुसार विपद्का बेला राजनीतिक दलहरूबीच समन्वय गरेर अघि बढ्नुपर्ने विषयलाई सभापति लामिछानेले पार्टीको नीतिका रूपमा आत्मसात् गरेको बताए।

“विपद्मा राजनीतिक दलहरूबीच समन्वय गरेर नै जानुपर्छ भन्नुभएको छ। त्यसलाई पार्टीले आत्मसात् गरेको छ।”

रास्वपाले भोटेकोसी बाढीबाट प्रभावित नागरिकको खोज, उद्धार, राहत तथा पुनर्स्थापनामा सरकार र अन्य राजनीतिक दलसँग आवश्यक समन्वय र सहकार्य गर्दै अघि बढ्ने जनाएको छ।

Originally published on abcnews.com.np.