काठमाडौं । राजर्षि जनक विश्वविद्यालयले शैक्षिक सत्र २०८३/८४ देखि स्नातक तथा स्नातकोत्तर तहमा भर्ना हुनेमध्ये कम्तीमा १० प्रतिशत विद्यार्थीलाई अनिवार्य छात्रवृत्ति उपलब्ध गराउने भएको छ। विश्वविद्यालय कार्यकारी परिषद्को बैठकले विश्वविद्यालयअन्तर्गतका आंगिक तथा सम्बन्धन प्राप्त क्याम्पसमा सञ्चालित सम्पूर्ण शैक्षिक कार्यक्रममा छात्रवृत्ति व्यवस्था लागू गर्ने निर्णय गरेको हो। छात्रवृत्ति जेहेन्दार, विपन्न तथा लक्षित वर्गका विद्यार्थीलाई प्रदान गरिनेछ। यसका लागि विश्वविद्यालयले ‘राजर्षि जनक विश्वविद्यालय छात्रवृत्ति व्यवस्थापन कार्यविधि, २०८३’ स्वीकृत गरेको छ। कार्यविधिअनुसार विश्वविद्यालयअन्तर्गतका आंगिक तथा सम्बन्धन प्राप्त क्याम्पसमा स्नातक र स्नातकोत्तर तहका सम्पूर्ण कार्यक्रममा भर्ना हुनेमध्ये कम्तीमा १० प्रतिशत विद्यार्थीलाई छात्रवृत्ति दिनुपर्ने व्यवस्था गरिएको रजिस्ट्रार डा. जीवन काफ्लेले जानकारी दिए। निर्णय कार्यान्वयनका लागि विश्वविद्यालयको रजिस्ट्रार कार्यालयले विज्ञान प्रविधि तथा इन्जिनियरिङ, व्यवस्थापन, मानविकी तथा कानुन र स्वास्थ्य विज्ञान संकायका डीन कार्यालयलाई पत्राचार गरेको छ। विश्वविद्यालयले छात्रवृत्ति वितरणलाई व्यवस्थित र पारदर्शी बनाउन स्वीकृत कार्यविधिअनुसार आवश्यक प्रक्रिया अघि बढाउने जनाएको छ।

Originally published on abcnews.com.np.