काठमाडौं । नेपाली कांग्रेसकी सांसद रेनुका काउचाले सुरुङमा फसेकाहरूको उद्धारका लागि विश्वमै प्रविधि नभएको भन्ने प्रधानमन्त्रीको अभिव्यक्तिप्रति आपत्ति जनाएकी छन्। बिहीबार प्रतिनिधिसभाको बैठकमा बोल्दै सांसद काउचाले बुधबार प्रधानमन्त्रीले दिएको अभिव्यक्ति गैरजिम्मेवार भएको बताइन्। “हाम्रा प्रधानमन्त्रीज्यू विशेषज्ञ र प्रविधिको सहयोग खोजेर हाम्रा नागरिकको ज्यान बचाउनुको साटो संसारमै यस्तो प्रविधि छैन भन्ने गैरजिम्मेवार तर्क दिएर आफ्नो असफलता र लाचारी लुकाउने प्रयास गर्दै हुनुहुन्छ,” उनले भनिन्। उनले भारतको उत्तराखण्डमा भएको यस्तै विपत्तिमा सुरुङभित्र फसेका ४१ जना श्रमिकलाई १७ दिनपछि सुरक्षित उद्धार गरिएको उदाहरण दिइन्। त्यस क्रममा जर्मनीबाट समेत विज्ञ ल्याइएको स्मरण गर्दै उनले नेपालमा उद्धारका लागि आवश्यक पहल हुन नसकेकोप्रति प्रश्न उठाइन्। सुरुङभित्र जीवनका लागि संघर्ष गरिरहेकाहरूलाई हिलो सुकेपछि निकालौँला भन्नु राज्य आफ्नो दायित्वबाट पछाडि हट्नु भएको उनको टिप्पणी छ।

Originally published on abcnews.com.np.