काठमाडौं । चीनको सिजाङ स्वायत्त क्षेत्रले नेपालका बाढी तथा पहिरो प्रभावित क्षेत्रमा प्रयोग गर्न दुईवटा बेलिब्रिज निर्माण गर्न पुग्ने सामग्रीसहितको आपत्कालीन राहत सामग्री नेपाललाई हस्तान्तरण गरेको छ।

शुक्रबार सिगात्सेस्थित रिझी नाकामा चिनियाँ पक्षले उक्त सामग्री नेपाली पक्षलाई औपचारिक रूपमा हस्तान्तरण गरेको हो। हस्तान्तरण गरिएको सामग्रीबाट १००–१०० मिटर लम्बाइका दुईवटा बेलिब्रिज निर्माण गर्न सकिने जनाइएको छ।

यसअघि ल्हासास्थित नेपाली महावाणिज्य दूतावासले बाढी तथा पहिरो प्रभावित क्षेत्रमा जडान गर्न चीनको सिजाङ स्वायत्त क्षेत्रसँग ३० वटा बेलिब्रिज उपलब्ध गराउन आग्रह गरेको थियो। सोही आग्रहअनुसार चीनले पहिलो चरणमा दुईवटा बेलिब्रिजका लागि आवश्यक सामग्री उपलब्ध गराएको हो।

ल्हासास्थित सिजाङ स्वायत्त क्षेत्रको वैदेशिक मामिला कार्यालय र नेपाली महावाणिज्य दूतावासबीच भएको औपचारिक हस्तान्तरण कार्यक्रममा ल्हासाका लागि नेपाली महावाणिज्यदूत लक्ष्मीप्रसाद निरौला र चिनियाँ पक्षका अधिकारीले हस्तान्तरण प्रमाणपत्र आदानप्रदान गरेका थिए।

सहयोगअन्तर्गत बेली प्यानल, रिइन्फोर्स सस्पेन्सन रड, सपोर्ट फ्रेम, ब्रिज डेकिङ र आई–बीम लगायतका पुल निर्माणका आवश्यक सामग्री छन्। यी सामग्री बाढीबाट क्षतिग्रस्त सडक तथा पुलमा यातायात सम्पर्क पुनःस्थापना गर्न प्रयोग गरिनेछन्।

चीनले भौतिक सामग्रीसँगै बेलिब्रिज जडानका लागि प्राविधिक जनशक्ति उपलब्ध गराउने जनाएको छ। चिनियाँ प्राविधिक टोली छिट्टै नेपाल आउने बताइएको छ।

बाढी तथा पहिरोबाट विभिन्न क्षेत्रमा पुल तथा सडक क्षतिग्रस्त भई यातायात सम्पर्क प्रभावित भइरहेका बेला प्राप्त बेलिब्रिजले प्रभावित क्षेत्रमा राहत, उद्धार तथा पुनःस्थापनाका सामग्री ओसारपसार र सडक सम्पर्क पुनःस्थापनामा सहयोग पुग्ने अपेक्षा गरिएको छ।

विपद्पछि चीनको सिजाङ स्वायत्त क्षेत्रले देखाएको द्रुत तत्परता र सहयोगप्रति नेपाली पक्षले हार्दिक आभार व्यक्त गरेको छ। पछिल्लो सहयोगले नेपाल–चीनबीच विपद्का समयमा देखिएको पारस्परिक सहयोगलाई थप बलियो बनाएको नेपाली पक्षको भनाइ छ।

Originally published on abcnews.com.np.