काठमाडौं । रसुवाको भोटेकोशी नदीमा आएको विनाशकारी बाढीमा परी मृत्यु हुनेको संख्या १ हजार ३२५ पुगेको छ।

नेपाल प्रहरीले सार्वजनिक गरेको विवरणअनुसार हालसम्म ५२२ पुरुष, ३२१ महिला र आंशिक अंगसहित ४८२ जनाको शव फेला परेको छ।

फेला परेका शवमध्ये १ हजार ३० जनाको पहिचान हुन सकेको छैन। पहिचान हुन नसकेका ती शवलाई जमिनमुनि गाडिएको प्रहरीले जनाएको छ।

बाढीपछि ठूलो संख्यामा मानिस अझै सम्पर्कविहीन छन्। प्रहरीका अनुसार स्वदेशी तथा विदेशी गरी ८ हजार ८९८ जनाको अवस्था अझै अज्ञात छ।

डीएनएबाट पहिचानको प्रयास

बेपत्ताको खोजी तथा मृतकको पहिचानका लागि प्रहरीले डीएनए संकलनलाई तीव्रता दिएको छ।

हालसम्म १ हजार २६० जना मृतकको डीएनए नमुना संकलन गरिएको छ। त्यस्तै, मृतकका आफन्तमध्ये ८४६ जनाको डीएनए नमुना संकलन गरिएको प्रहरीले जनाएको छ।

मृतकका आफन्तबाट संकलित डीएनएलाई फेला परेका शव तथा मानव अवशेषसँग मिलाएर पहिचान गर्ने प्रक्रिया अघि बढाइएको छ।

भोटेकोशीमा आएको बाढीले रसुवाका जलविद्युत् आयोजना, सडक, बस्ती तथा संरचनामा ठूलो क्षति पुर्‍याएको थियो। बाढीपछि बेपत्ता भएकाहरूको खोजी, शव संकलन तथा पहिचानको काम अझै जारी छ।

Originally published on abcnews.com.np.