काठमाडौं । कास्कीको पोखरास्थित फेवातालबाट शनिबार (भदौ २०) एक युवकको उद्धार गरिएको छ । उदयपुरका २१ वर्षीय आयुष तामाङलाई अचेत अवस्थामा उद्धार गरिएको सशस्त्र प्रहरी बलले जनाएको छ ।

पोखरा महानगरपालिका–६ स्थित तालबाराही मन्दिरपछाडि फेवाताल घुम्न आएका तामाङ कायकिङ गर्ने क्रममा त्यहाँ डुबेका थिए । त्यसपछि सशस्त्र प्रहरी सहायक निरीक्षक रामप्रसाद शर्माको कमान्डमा विपद् उद्धार टोली (गोताखोर) आवश्यक सामग्रीसहित खोजतलासमा खटिएको थियो ।

खोजतलासका क्रममा दिउँसो २ः५० बजे तालको अन्दाजी ३० फिट गहिराइबाट गोताखोर टोलीले तामाङलाई अचेत अवस्थामा फेला पारी बाहिर निकालेको सशस्त्र प्रहरीले जनाएको छ ।

उद्धारलगत्तै उनलाई थप उपचारका निम्ति दिउँसो २ः५५ बजे पोखरा स्वास्थ्य विज्ञान प्रतिष्ठान (पश्चिम क्षेत्रीय अस्पताल)तर्फ पठाइएको सशस्त्र प्रहरीले जनाएको छ ।

Originally published on abcnews.com.np.