पोखरा/निशुल्क स्वास्थ्य शिविरलाई अभियानकै रुपमा अघि बढाएको युनाइटेड रेफरेन्स ल्याबोरेटरी प्रालि (युआरएल) को प्राविधिक सहयोगमा शनिबार पोखरामा रगतमा हुने खराब बोसो (टिजी) र मधुमेह जाँच सित्तैमा गरिएको छ ।

सयपत्री बचत तथा ऋण सहकारी पोखरा–८ को १६ औँ साधारणसभामा भएको शिविरमा एक सय २० जनाको सित्तैमा जाँच गरिएको हो । कार्यक्रममा डा पेट तथा कलेज रोग विशेषज्ञ डा शंकर बराल आन्द्राको क्यान्सर, ग्याष्ट्रिक र यसबाट आउन सक्ने समस्या र कलेजोका रोगहरुबारे प्रकाश पारे ।

उनले भने, ‘कलेजो ९०सम्म बिग्रिदा पनि केही लक्षण नदेखिन सक्छ । त्यसैले बेला बेलामा जाँच गर्नैपर्छ ।’ उनले पेटका समस्या बढ्दै गएको जनाउँदै सकेसम्म रोग लाग्नै नदिन र लागिहाले विशेषज्ञको सल्लाहमा उपचार गर्न आग्रह गरे ।

सहकारीका ज्येष्ठ सदस्य मोतिराम गुरुङको अध्यक्षतामा भएको कार्यक्रममा सहकारीका अधयक्ष दिलीप शर्माले पनि बोलेका थिए । १३ वर्षअघि स्थापना भएको युआरएल गण्डकी प्रदेशको पहिलो रेफरेन्स ल्याब हो । प्रदेशको एकमात्र आइएसओ प्रमाणपत्र प्राप्त युआरएलले स्थापनादेखि नै विभिन्न संघ, संस्थासँग सहकार्य र आफ्नै आयोजनामा निशुल्क रक्त जाँच शिविर गर्दै आएको छ ।

Originally published on abcnews.com.np.