काठमाडौं । डिभाइन फिटनेसका सगेन्द्र सिंह छैटौँ मिस्टर काठमाडौं बडीबिल्डिङ तथा फिजिक स्पोर्ट्स च्याम्पियनसिपको उपाधि जितेका छन्।

काठमाडौंमा शनिबार सम्पन्न प्रतियोगितामा सगेन्द्रले पुरुष बडीबिल्डिङको ८० केजी तौल समूहमा स्वर्ण जित्दै ओभरल प्रतिस्पर्धाका लागि छनोट भएका थिए। ओभरलमा पनि पहिलो हुँदै उनले मिस्टर काठमाडौंको उपाधिसहित ५ लाख रुपैयाँ पुरस्कार पाए। तौल समूह विजेताका रूपमा उनले थप ४० हजार रुपैयाँ प्राप्त गरे।

सगेन्द्रले दुई महिनाअघि भुटानमा सम्पन्न दक्षिण एसियाली बडीबिल्डिङ च्याम्पियनसिपमा समेत स्वर्ण जितेका थिए। उनी आगामी सेप्टेम्बर २२ देखि २८ सम्म थाइल्यान्डमा हुने एसियन बडीबिल्डिङ च्याम्पियनसिपमा सहभागी हुँदै छन्।

महिला फिजिकतर्फ जुनी राई विजेता बनिन्। सृजना घिसिङ दोस्रो र शान्ता पालिखेल तेस्रो भए। जुनीले यसअघि १३औँ दक्षिण एसियाली खेलकुदमा उसुको ५६ केजी सान्डा विधामा स्वर्ण जितेकी थिइन्।

पुरुष बडीबिल्डिङतर्फ ५५ केजीमा महेन्द्रबहादुर थापामगर, ६० केजीमा सुजन थापा, ६५ केजीमा सुरब थापा, ७० केजीमा नवीन श्रेष्ठ, ७५ केजीमा सागर श्रेष्ठ र ८० केजीभन्दा माथि ललित धिमालले स्वर्ण जिते।

मेन्स स्पोर्ट्स फिजिकमा ज्ञानेश्वर चौधरी र आशिम सिंह थापा तथा मेन्स एथलेटिक फिजिकमा सुमन राई र शंकर गुरुङ आ–आफ्ना उचाइ समूहमा विजेता बने। महिला बडीबिल्डिङको उपाधि रिपु घर्तीले जितिन्।

जुनियरतर्फ सर्वेश सुनार, मास्टर्सतर्फ रमेश अधिकारी विजेता बने।

प्रतियोगिता काठमाडौं बडीबिल्डिङ एन्ड फिटनेस एसोसिएसनले आयोजना गरेको हो। विजेताहरूलाई काठमाडौं महानगरपालिकाकी कार्यवाहक प्रमुख सुनिता डंगोल र प्रतिनिधिसभा सदस्य रजनी श्रेष्ठलगायतले पुरस्कार वितरण गरेका थिए।

Originally published on abcnews.com.np.