काठमाडौं, १६ वैशाख । काठमाडौंको मनमैजुमा ट्याक्सी चालकमाथि हत्याको प्रयास भएको छ । आफुले भनेको ठाउँमा जान नमानेको भन्दै शुक्रबार राती मनमैजु पुल नजिकै दुई युवकले ट्याक्सी चालक अच्युत कार्कीको हत्या प्रयास गरेका हुन्।

बालाजु वृत्तका प्रहरी निरीक्षक जनार्दन घिमिरेका अनुसार राती करिब साढे नौ बजे उनीहरुले बा २ ज ४८१७ नम्बरको ट्याक्सी रोकेका थिए। उनीहरुले ट्याक्सी चालक कार्कीलाई आफुले भनेको ठाउँमा जानुपर्ने बताए। तर, कार्कीले आफुले त्यहाँ जान नसक्ने बताएपछि विवाद भएको थियो। विवादपछि उनीहरुले नजिककै मासु पसलबाट खुँडा ल्याएर चालक कार्कीमाथि आक्रमण गरेको प्रहरी निरीक्षक घिमिरेले बताए।

घटनामा संलग्न दुई युवकलाई प्रहरीले पक्राउ गरेको छ। बानियाटार बस्ने सुमन खाती र सिन्धुपाल्चोक कटुञ्जे घर भएका पेम्बा तामाङलाई महानगरीय प्रहरी वृत्त बालाजुले शनिबार पक्राउ गरेको हो।

चालक कार्कीको बायाँ खुट्टा, बायाँ हात लगायत शरिरका विभिन्न ठाउँमा चोट लागेको छ। अहिले उनको उपचार भइरहेको छ । उनको अवस्था खतरामुक्त छ ।

घटनापछि फरार भएका अभियुक्तहरुलाई प्रहरीले खोजी गरि पक्राउ गरेको हो । उनीहरु विगतमा पनि चोरी लगायत विभिन्न मुद्दामा पक्राउ परि छुटेको खुलेको छ।