जाजरकोट, २७ वैशाख। जिल्लाभरि हुने विकास निर्माणका काममा मजदुरको अभाव भएको छ ।

यहाँका सातै वटा स्थानीय तहमा विकास निर्माणका लागि मजदुरको अभाव भएको छ । अधिकांश युवा कमाई गर्न भारत तथा डोल्पामा यार्सागुम्बा संकलनका लागि जान थालेपछि विकास निर्माणको काम प्रभावित भएको हो । अहिले जिल्लाका सबै स्थानीय तहमा विकासे बजेटको काम भइरहेको छ ।

उपभोक्ता समितिका पदाधिकारी मजदुर नभएर हैरान भएको बताउन थालेका छन् । जिल्लाको विकास निर्माणका कामका लागि बाहिरबाट मजदुर ल्याएर काम गर्न बाध्य हुनु परेको नलगाड हाइड्रोपावर कम्पनीले जनाएको छ ।

एउटै वडामा करोडभन्दा बढीको विकास निर्माणको काम भइरहेको छ । काम पाएनौँ भन्दै स्थानीय बासिन्दा बाहिर जिल्लामा गएर काम गरिरहेको पाइएको छ । ज्याला कम भएका कारण जिल्लाभित्र काम गर्न नसकेको बारेकोट–६ का लालबहादुर कामीको भनाइ छ ।

सल्लीबजारदेखि जाजरकोटसम्मको सडकमा पुल निर्माणको काम भइरहेको छ । त्यहाँ काम गर्ने सबै मजदुर बाहिर जिल्लाबाट आएका छन् । नलगाड हाइडा«ेपावर कम्पनी र स्थानीय तहको विकास निर्माणमा जिल्ला बाहिरका कामदारले मजदुरी गर्दैआएका छन् ।