नयाँ दिल्ली, २५ असार । अखिल (क्रान्तिकारी) का उपाध्यक्ष दिपेश पुनले विदेशमा अध्ययनरत सबै नेपाली विद्यार्थीले आफ्नो देशको समृद्धिका लागि सक्ने योगदान गर्नुपर्ने बताएका छन् ।

हरेक विद्यार्थीले आफूलाई देशको दूत सम्झिएर देशको समृद्धिका लागि आ–आफ्नो ठाउँबाट सक्दो सहयोग गर्न आग्रह गरे । आफू बसिरहेको देशमा रहेका नेपालीहरुको हकहित र आफ्नो देश निर्माणका लागि विद्यार्थीहरुले राजदूत सम्झेर काम गर्नुपर्ने उनको भनाइ थियो ।

आइतबार भारतको नयाँ दिल्लीस्थित अनेरास्ववियु र अखिल (क्रान्तिकारी) दिल्लीको संयुक्त आयोजनामा भएको अन्तरक्रिया कार्यक्रममा उपाध्यक्ष पुनले मुलुकको अबको यात्रा सुशासन र समृद्धितर्फ हुने बताए ।

उनले भने, ‘अबको हाम्रो यात्रा आम नेपालीहरुको अवस्था बदल्न हुनेछ । स्थायी वाम सरकार राष्ट्रिय एकता र स्वाधिनताको जगमा समृद्धिको यात्रातर्फ अघि बढेको छ ।’

नेपाल–भारत सम्बन्धमा केही दलाल र विचौलियाहरुको कारण बेला–बेलामा समस्या परेको भन्दै पुनले फेरिएको परिस्थिति, बदलिएको सरकार र संरचना अनुसार भारतसँग अब नयाँ सम्बन्ध कायम हुनुपर्ने बताए । यसको लागि विद्यार्थीहरुले पनि भूमिका निर्वाह गर्नुपर्ने उनको तर्क छ ।

कार्यक्रममा नेविसंघ भारतका पूर्व अध्यक्ष सन्दिप राणाले आस्थाका आधारले जो जहाँ सुकै भएपनि विदेश अध्ययनरत विद्दार्थीहरु एउटै मन र तन लिएर आफ्नो देश र एकले अर्कोलाई पर्दा साथ र सहयोग गर्नुपर्नेमा जोड दिए ।

त्यसैगरी नयाँ दिल्ली विश्वविद्यालय छात्र संघका पूर्वमहासचिव अकित, नेविसंघ भारतका अध्यक्ष गिरी न्यौपाने, नयाँशक्ति विद्यार्थी यूनियन केन्द्रीय समितिका उपाध्यक्ष तथा विदेश विभाग प्रमुख दिपक महतो, अनेरास्ववियू दिल्ली सचिव सागर केसी लगायतले आफ्नो धारणा राखे । कार्यक्रम अखिल (क्रान्तिकारी) दिल्लीका अध्यक्ष मदन बस्नेत र अनेरास्ववियू दिल्लीका नेता सन्देश केसीले सञ्चालन गरेका थिए ।