एजेन्सी, १३ साउन। रेफ्रीले प्रयोग गर्ने पहेँलो कार्ड भनेका मैदानमा खेलाडीले गल्ती गरे भने उनीहरुलाई चेतावनी दिनका लागि हो ।

तर सिंगापुरमा एक रेफ्रीले पहेँलो कार्ड खेलाडीलाई चेतावनी दिन होइन, खेलाडीको अटोग्राफ लिनका लागि प्रयोग गरेका छन्।
शनिबार बेलुका सिंगापुरमा पेरिस सेन्ट–जर्मेन पिएसजी विरुद्ध आर्सनलको खेल भएको थियो ।खेल सुरु हुनुभन्दा अघि भर्खरै राष्ट्रिय टिमबाट सन्यासको घोषणा गरेका जर्मन मेसुट ओजिल खेलका लागि मैदान जाँदै थिए । टनेलमा खेलका रेफ्रीले ओजिलसँग अटोग्राफ मागे ।

रेफ्रीले पहेँलो कार्डमा अटोग्राफ दिन आग्रह गर्दा ओजिल केही अकमकिएका थिए । तर उनले मुस्कुराउँदै पहेँलो कार्डमा हस्ताक्षर गरे । त्यसपछि मैदान छिरेका उनले गोल गर्दै टिमलाई सुरुवाति अग्रता दिलाए ।

उनको गोलमा अग्रता लिएको आर्सनलले पिएसजीलाई ५–१ ले हराउदै सानदार जित हात पारेको थियो । हाल नयाँ सिजनको तयारीमा रहेको आर्सनल अन्तर्राष्ट्रिय च्याम्पियन्स कपका लागि सिंगापुरमा छ ।