दाङ,२० असोज । नेपाल निर्माण ब्यवसायी महासंघ प्रदेश ५ का नवनिर्वाचित अध्यक्ष वलिभद्र रानाले सरकारी नितिका कारण निर्माण ब्यवसायी समस्यामा परेको बताउनु भएको छ ।

रिपोर्टर्स क्लव नेपाल दाङले शनिवार तुलसिपुरमा आयोजना गरेको साक्षात्कार कार्यक्रममा वोल्दै कार्यक्रमका प्रमुख अतिथिसमेत रहनु भएका अध्यक्ष रानाले सरकारको फीतलो नितीका कारण ब्यवसायी समस्यामा परेको बताउनु भएको हो ।

उहाँले राम्रो काम गर्ने निर्माण ब्यवसायिहरुलाई पुरस्कृत र गलत गर्नेलाई कडा कारवाही गर्ने निति नवन्दासम्म समस्या समाधान नहुनेमा जोड दिनु भयो । अध्यक्ष रानाले पछिल्ला केही वर्ष यता विकास निर्माणमा ढिला सुस्तिका खवरहरु सार्वजनिक भएको प्रति चिन्ता ब्यक्त गर्दै निर्धारीत समयमै काम नगर्ने निर्माण ब्यवसायीलाई सरकारले कारवाही गर्न सक्नुपर्ने विचार ब्यक्त गर्नु भयो ।

सरकारी नितिकै कारण पनि विकास निर्माणका धेरै कामहरु समयमै सम्पन्न नहुने भन्दै उहाले समयमै बजेट नआउने, सरकारी कार्यालय विच समन्वय नहुँदा र अन्य काम गर्नेक्रममा आइपर्ने समस्या समाधानका लागि सरकार गम्भिर नवनेका कारण पनि जनअपेक्षा अनुरुप विकास निर्माणले गति लिन नसकेको बताउनु भयो ।

उहाँले सरकारले टेण्डर आह्रवान गर्दा एकै ब्यक्तिलाई धेरै काम दिने र समयमै काम नगरेपनि म्याद थप्ने प्रबृत्तिका कारण पनि विकास निर्माणमा सम्वन्धित निकायको लापरवाही देखीएको समेत उल्लेख गर्नुभयो ।

रिपोर्टर्स क्लव नेपाल दाङका अध्यक्ष शरद रेग्मीको अध्यक्षतामा भएको कार्यक्रममा वोल्दै अध्यक्ष रानाले प्रदेश ५ मा निर्माण ब्यवसायीहरुले नमुना योग्य काम गरेर देखाउने बताउनु भयो ।

त्यसका लागि प्रदेश ५ को निर्माण ब्यवसायीहरुको भेला दाङमा आयोजना गरीएको र भेलावाट प्रदेश ५ को सरकारसंग सहकार्य गरी प्रदेशमा दिगो विकास र समयमै काम सम्पन्न गर्ने गरी निति नियम बनाउने उहाँले बताउनु भयो ।