काठमाडौं । रसुवाको भोटेकोशी नदीमा आएको बाढीबाट प्रभावित नागरिकको उद्धारका लागि नेपाली सेनाका दुईवटा हेलिकोप्टर परिचालन गरिएको छ।

प्रधानमन्त्री पुष्पकमल दाहाल ‘प्रचण्ड’को निर्देशनमा मेडिकल टिमसहितका दुई हेलिकोप्टर प्रभावित क्षेत्रतर्फ पठाइएको प्रधानमन्त्रीको सचिवालयले जनाएको छ। सम्भावित उद्धार तथा राहत कार्यलाई प्रभावकारी बनाउन निजी कम्पनीका हेलिकोप्टरसमेत तयारी अवस्थामा राखिएको छ।

प्रधानमन्त्री दाहालले आज बिहान ११ बजे प्रधानमन्त्री तथा मन्त्रिपरिषद्को कार्यालयमा विपद् जोखिम न्यूनीकरण तथा व्यवस्थापन राष्ट्रिय परिषद्को बैठकसमेत बोलाउनुभएको छ।

प्रधानमन्त्रीले भोटेकोशी बाढीबाट प्रभावित नागरिकको तत्काल उद्धार गर्न र आवश्यक राहत सामग्री उपलब्ध गराउन सम्बन्धित निकायलाई निर्देशन दिनुभएको छ। उहाँले सबै निकायबीच आवश्यक समन्वय गरी उद्धार कार्यलाई तीव्रता दिनसमेत आग्रह गर्नुभएको छ।

प्रधानमन्त्रीको सचिवालयका अनुसार प्रभावित क्षेत्रमा तत्काल मेडिकल टिम र राहत सामग्री पठाउन पनि निर्देशन दिइएको छ।

प्रधानमन्त्री दाहालले बाढीबाट भएको जनधनको क्षतिप्रति दुःख व्यक्त गर्दै प्रभावित परिवारप्रति समवेदना प्रकट गर्नुभएको छ।

Originally published on abcnews.com.np.