बुटवल, ६ साउन ,
आज साउने सोमबारको पहिलो दिन, देशैभरका शिव मन्दिरहरुमा भक्तजनहरुको भिड लागेको छ ।
रुपन्देहीको सैनामैनामा अवस्थित पर्रोहा शिव ज्योतिर्लिङ्ग बोलबम धाममा आजबाट श्रावणी मेला सुरु भएको छ । एक महिना सम्म लाग्ने मेलामा रुपन्देही र यस आसपासका जिल्लाबाट मन्दिर दर्शन गर्न आउने गर्दछन् । साउनमा शिवलिङ्गमा चढाईने गङ्गाजल लामो पैदल यात्रा पार गरेर पर्रोहा बोलबम धाममा चढाउन भक्तजनहरु आउने गर्दछन् । गय मध्यरातीबाटै मन्दिरमा बोलबम धाम दर्शन गर्न आउनेहरुको घुंईचो लागेको थियो ।
पर्रोहा धामलाई काठमाण्डौमा अवस्थित पशुपतिनाथ पछिको दोस्रो पशुपतिकारुपमा भक्तहरुले लिने गरेको मन्दिर ब्यवस्थापन समितीका महासचिव दिनेश भुसालले जानकारी दिनुभयो ।
भक्तहरुले पश्चिममा कपिलवस्तुको लक्ष्मणघाट र पुर्वमा त्रिबेणीधाम देखि गङ्गाजल लिएर पर्रोहा धाममा चढाउन आउने गर्दछन् । बोलबम यात्रालाई पहिलेको तुलनामा ब्यवस्थित बनाईएकाले भक्तजनहरुको आकर्षण बढेको बोलबम यात्रा समितीका संयोजक अर्जुन धमालले बताउनुभयो ।
पुर्व पश्चिम राजमार्गको रानीबगियाबाट करिव ३ किलोमिटर पश्चिममा रहेको पर्रोहा बोलबम धाममा बिगत एक दशक देखि हरेक वर्ष श्रावणी मेला संचालन हुंदै आएको छ ।