इटहरी, भदौ १४ गते । भोटेकोशी नदीमा आएको विनाशकारी बाढीबाट प्रभावित नागरिकका लागि जाजु ग्रुप तथा शारडा ग्रुपले करिब ६० लाख रुपैयाँ बराबरको राहत सामग्री उपलब्ध गराउने भएका छन्। जाजु ग्रुपका अध्यक्ष तथा एसियन थाइ फुड्स लिमिटेडका प्रबन्ध निर्देशक महेश जाजुका अनुसार राहत सामग्री स्थानीय प्रशासनसँग समन्वय गरी सोमबार प्रभावित क्षेत्रमा पठाइनेछ। सुनसरीको सोनापुरस्थित एसियन थाइ फुड्सले एक लाख प्याकेट रमपम चाउचाउ, एक लाख प्याकेट गुडलाइफ बिस्कुट र एक लाख प्याकेट जुस उपलब्ध गराउने भएको हो। उद्योगी जाजुले विपद्का कारण नागरिक समस्यामा परेका बेला सरकारसँगै निजी क्षेत्रको पनि सामाजिक दायित्व हुने भएकाले मानवीय सेवाको भावनाले राहत उपलब्ध गराइएको बताए। उनले विपद्मा परेका नागरिकलाई तत्काल आवश्यक पर्ने खाद्यान्न तथा अन्य सामग्री उपलब्ध गराउन निजी क्षेत्रले आफ्नो क्षमताअनुसार सहयोग गर्नुपर्ने बताए। आगामी दिनमा आवश्यकताअनुसार थप सहयोग गर्ने प्रतिबद्धतासमेत उनले जनाए। जाजुका अनुसार जाजु ग्रुप र एसियन थाइ फुड्सले विगतदेखि नै सामाजिक तथा मानवीय सेवाका क्षेत्रमा विभिन्न किसिमका सहयोग गर्दै आएका छन्। विपद्का बेला प्रभावित नागरिकलाई सहयोग गर्नु उद्योग–व्यवसाय क्षेत्रको सामाजिक उत्तरदायित्व भएकाले यस्तो सहयोगलाई निरन्तरता दिइने उनले बताए। यसैबीच, उद्योगी जाजुले राष्ट्रिय स्वतन्त्र पार्टीका अध्यक्ष रवि लामिछानेसँग भेट गरी विपद्का बेला निजी क्षेत्रबाट गर्न सकिने सहयोगबारे छलफल गरेका छन्। भेटमा उनले भोटेकोशी बाढी प्रभावित नागरिकका लागि आफूहरूबाट सक्दो सहयोग गर्ने प्रतिबद्धता व्यक्त गरे। संकटको समयमा राज्य र निजी क्षेत्रबीचको सहकार्यलाई अझ प्रभावकारी बनाउनुपर्नेमा जोड दिँदै जाजुले राहत तथा उद्धार कार्यमा आवश्यक सहयोग गर्न आफूहरू तयार रहेको बताए।

Originally published on abcnews.com.np.