तनहुँ, ११ साउन । तनहुँको बन्दीपुर गाउँपालिकाले प्राचीन कला तथा संस्कृतिको संरक्षण हुने गरी घर निर्माण गर्दा नक्सापासमा ५० प्रतिशत छुट दिने व्यवस्था हटाएको छ ।

गाउँपालिकाले पाँचाँै गाउँसभामार्फत चालू आर्थिक वर्ष २०७६/७७ देखि लागू हुने गरी नक्सापासमा ५० प्रतिशत छुट दिने व्यवस्था हटाएको हो । बन्दीपुर संरक्षित उपक्षेत्रमा निर्माण हुने घरलाई नक्सापासमा दिइने गत वर्षको छुट व्यवस्था चालू आव २०७६/७७ देखि हटाइएको गाउँपालिकाका अध्यक्ष पूर्णसिं थापाले बताउनुभयो ।

“सबै नागरिकलाई समान अवसर र सुविधाको नीति अवलम्बन गरी उक्त व्यवस्था हटाएका छौँ”, थापाले भन्नुभयो, “नक्सापासमा भन्दा घर निर्माण गर्दा नै अनुदान दिने विषयमा छलफल भइरहेको छ ।” थापाका अनुसार प्राचीन घर बनाउँदा आँखी झ्यालमा रु ३० हजार बराबरको अनुदान दिने विषयमा छलफल भइरहेको छ ।

गाउँपालिकाले बन्दीपुर रिङरोडभित्र र रिङरोड बाहिर ५०० मिटर क्षेत्रलाई संरक्षित उपक्षेत्र घोषणा गरेको छ । यस क्षेत्रभित्र घर बनाउँदा बस्ती विकास, शहरी योजना तथा भवन निर्माणसम्बन्धी आधारभूत मापदण्ड २०७२ का साथै गाउँपालिकाले बनाएका केही नियमहरु पालना गर्नुपर्ने हुन्छ । बन्दीपुर बजारमा भएका पुराना घरहरुको आकर्षणले गर्दा पर्यटकको आगमन बढ्दै गएकाले उपक्षेत्रभित्र घर बनाउँदा आधुनिक र पश्चिमेली शैली झल्काउन नपाइने नियम गाउँपालिकाले बनाएको छ ।

बजार क्षेत्रभित्र बनिसकेका घरको अगाडिको भाग प्राचीन शैलीमा निर्माण गर्न अनुरोध गरिएको थापाले बताउनुभयो । थापाका अनुसार उपक्षेत्रभित्र घर निर्माण गर्दा परम्परागत नेपाली शैली एवं आकारप्रकार काठका झ्याल, ढोकाहरु पसलको कवलमा समेत राख्नुपर्ने, चोकमाथि पर्ने गरी क्यान्टिलिभिर, बार्दली, कोठा निकाल्न नपाइने, बाहिरी गाह्रोमा प्लाष्टर नगरी प्रष्टसँग इट्टा देखाउनुपर्ने, बाटो वा चोकतर्फ देखिने भागमा स्लोप छाना हुनुपर्ने लगायतका नियम बनाइएको छ ।

साथै कला, वास्तुकला एवं धार्मिक दृष्टिकोणले महत्वपूर्ण रहेको ठाउँमा, स्मारक वा स्मारकको कम्पाउण्डको वरिपरिका पहिलो पङ्तिका घरहरु स्मारक भन्दा होचा हुने गरी निर्माण गर्नुपर्नेछ । गाउँपालिकाले घर नक्सापासका लागि एक घर दुई बिरुवाको नीति ल्याएको गाउँपालिकाका उपाध्यक्ष करुणा गुरुङले जानकारी दिनुभयो । “हरियो बढाउ सन्ततीलाई जोगाउ” भन्ने नाराका साथ एक व्यक्ति एक रुखको नीतिसमेत ल्याइएको छ ।