काठमाडौँ, १३ साउन  । ऊर्जा, जलस्रोत तथा सिँचाइमन्त्री वर्षमान पुनले तराई – मधेसको बाढी र डुबानको समस्या समाधानका लागि ठोस् नीतिसहित स्पष्ट कार्ययोजना बनाएर लागू गर्ने बताउनुभएको छ ।

प्रदेश नं– २ का मुख्यमन्त्री लालबाबु राउतलगायतसँग आज मन्त्रालयमा भएको छलफलमा मन्त्री पुनले तराई–मधेशको समस्या समाधानका लागि केन्द्र सरकारले विशेष चासो दिएको भन्दै एकीकृत कार्ययोजना जरुरी रहेको बताउनुभएको हो । मन्त्री पुनले तराई–मधेश डुबानको दीर्घकालीन समाधानका लागि ठोस् कार्ययोजना आवश्यक भएकाले सोहीअनुसार केन्द्र र प्रदेश सरकार एकाकार भएर अगाडि बढ्नुपर्नेमा जोड दिनुभयो ।

उहाँले बाढी र डुबान समस्यालगायत प्राकृतिक प्रकोपविरुद्ध केन्द्र सरकार र प्रदेश मिलेर अघि बढ्नुपर्ने धारणा राख्नुभयो । मन्त्री पुनले प्रदेश नं २ बाढी डुबानबाट सबैभन्दा बढी प्रभावित भएको भन्दै स्थानीय जनतासँगको सहकार्यमा दुवै सरकारले काम गर्नुपर्ने बताउनुभयो । “डुबानको जरो कुरा पत्ता लगाउन एकीकृत योजना बनाएरै अघि बढौँ, दुवै सरकारबीच समन्वय गरेर एकीकृत योजना बनाए मात्र दीर्घकालीन समस्या समाधान हुन्छ । नभए राज्यले हरेक वर्ष लगानी गरेर फाइदा हुदैन”, मन्त्री पुनले भन्नुभयो ।

उहाँले तत्कालीन समाधानले राज्यको अर्बौ पैसा खेर गएको भन्दै समस्या समाधानका लागि एकीकृत योजना बनाउनुको विकल्प नभएको बताउनुभयो । प्रदेशका भौतिक पूर्वाधारमन्त्री जीतेन्द्र सोनलसहित मन्त्रालय पुग्नुभएका मुख्यमन्त्री राउतले तराई–मधेशमा भइरहेको बाढी डुबानको विषयमा मन्त्री पुनसँग छलफल गर्नुभएको हो ।

मुख्यमन्त्री राउतले मधेशमा हुने बाढी र डुबानको समस्याको दीर्घकालीन समाधान नखोजे अवस्था भयावह हुने बताउनुभयो । उहाँंले टालटुले समाधानले समस्याको हल नभएको भन्दै केन्द्र सरकारले दीर्घकालीन योजना बनाउनुपर्नेमा जोड दिनुभयो । उहाँले केन्द्र सरकारको ध्यान ठूला नदी व्यवस्थापनामा मात्र गएको भन्दै मधेशमा रहेका साना नदीले पनि क्षति पु¥याउने गरेको जानकारी दिनुभयो ।

उहाँले ऊर्जामन्त्री पुनसँग मधेशमा बाढी र डुबानका कारण अर्बौको क्षति भएको भन्दै आगामी दिनमा समस्याको समाधानका लागि दीर्घकालीन योजना बनाइदिन आग्रह गर्नुभयो । उहाँले भन्नुभयो, “हालसम्म टालटुलमर्मत गर्ने काम मात्र भयो, यसले हाम्रो समस्या समाधान भएन, ब्यापक रुपमा तटबन्ध निर्माण गर्नुपर्छ, दीर्घकालीन समाधान नखोज्ने हो भने समग्र भूभाग नै खतरामा पर्ने सम्भावना छ ।”