नेपालगञ्ज, २४ असोज । जुवा खालमा छापा मारेर बाँकेको नेपालगञ्जबाट प्रहरीले १ लाख ८३ हजार ९ सय रुपैयाँसहित १७ जनालाई पक्राउ गरेको छ । बिहीबार राती जिल्ला प्रहरी कार्यालय बाँकेबाट खटिएको बिशेष प्रहरी टोलीले नेपालगञ्ज उपमहानगरपालिका ४ गणेशपुरको एक घरमा छापा मारेर जुवाडेहरुलाई पक्राउ गर्न सफल भएको हो

। १ लाख ८३ हजार ९ सय रुपैयाँसहित जुवाडेहरुलाई नियन्त्रणमा लिइएको जिल्ला प्रहरी कार्यालय बाँकेका प्रवक्ता तथा प्रहरी नायब उपरीक्षक शिवबहादुर ंिसंहले पुष्टी गरे । ‘केही जुवाडेहरुलाई १ लाख ८३ हजार बढी रकम सहित पक्राउ गरेका छौं’ उनले भने, ‘अहिले यसबारे सबै कुरा मलाई थाहा भएन मुद्दा फाँटलाई सोध्नुहोला ।’ मुद्दा फाँटका इन्चार्ज प्रहरी निरीक्षक दिपक मल्लले भने जुवा खालमा छापा हान्नु र जुवाडे पक्राउ पर्नु सामान्य घटना भएको बताए ।

‘अहिले जुवाडे पक्राउ पर्नु सामान्य कुरा हो’ उनले भने, ‘हिजो राती पनी केही जुवाडेहरु पक्राउ परेका छन् ।’ प्रहरी निरीक्षक मल्लका अनुसार नेपालगञ्ज ४ गणेशपुरमा रहेको टेक बहादुर थापा क्षेत्रीको घरमा जुवा भइरहेको अवस्थामा छापा मार्दा उनीलाई रकमसहित नियन्त्रणमा लिइएको थियो । उनले पक्राउ परेका अन्य १६ जनाको नाम र ठेगाना भने खुलाउन चाहेनन् । ‘तपाईलाई पक्राउ परेकाहरुको नाम र ठेगाना दिन माथिको आदेश चाहिन्छ’ उनले भने, ‘पक्राउ परेकाहरुलाई कानुन अनुसार कारबाही हुन्छ ।’ घरधनी थापाक्षेत्रीलाई समेत प्रहरीले नियन्त्रणमा लिएको छ । सुरक्षा स्रोतबाट नै प्राप्त विवरण अनुसार पक्राउ अधिकांश यस क्षेत्रका पेशेवर जुवाडेहरु नै रहेका छन् ।

प्रहरीको मिलोमतो नै नेपालगञ्ज क्षेत्रमा जुवा फस्टाइरहेको प्रहरीलाई आरोप लागिरहेको बेला बिहीबार राती प्रहरीले जुवा खालमा छापा मारेको हो । अझै पनी नेपालगञ्ज क्षेत्रमा प्रहरीको मिलोमतोमा नै ठूला जुवाहरु भैरहेको बताइन्छ । इलाका प्रहरी कार्यालय कोहलपुर भने केही दिन यता जुवा विरुद्द अपरेशन नै चलाएर धमाधम जुवा खालबाट रकमसहित जुवाडेहरु पक्राउ गरिरहेको छ ।