बुटवल, ३ मंसिर ।
टेलिभिजन पत्रकारितामा थप चुनौती बढ्दै गएकोले वर्तमान अवस्थामा न्यूज ब्रेकिङ भन्दा पनि मुद्धामा केन्द्रीत हुनुपर्ने सरकोरवालाहरुले बताएकाछन् ।

लुम्बिनी प्रेस क्लब, रुपन्देहीद्वारा आयोजित तीन दिने लुम्बिनी न्यूज फेस्टिबल अन्तर्गत मंगलबार भएको संघीयतामा टेलिभिजन विषयक छलफलमा सहभागि वक्ताहरुले टेलिभिजन पत्रकारितालाई नयाँ ढंगले सञ्चालन गर्नुपर्ने बताए ।
कार्यक्रममा बोल्दै कान्तिपुर टेलिभिजनका प्रधान सम्पादक प्रशान्त अर्यालले अबको टेलिभिजन पत्रकारितामा मुद्दालाई प्राथमिकता दिनुपर्ने बताउनुभयो । उहांले टेलिभिजन भन्दा छापा तथा न्यु मिडीयाका माध्यमहरु अगाडी बढ्दै गएको बताउँदै टेलिभिजनलाई नयाँ ढंगलेसञ्चालन गर्नुपर्ने बताउनुभयो । यथास्थितीमा टेलिभिजन सञ्चालन गरे टेलिभिजन पत्रकारीताको भबिश्य समाप्त हुने सम्पादक अर्यालले बताउनुभयो ।
सगरमाथा टेलिभिजनका सम्पादक गणेशमान गुरुङले टेलिभिजनमा काम गर्नेलाई राम्रो समाचार लेखेर नभइ राम्रो खिच्नु पनि पर्ने भएकोले अरु सञ्चारमाध्यम भन्दा यसमा बढी मिहिनेत गर्नुपर्ने बताउनुभयो ।
एबीसि टेलिभिजन प्रदेश ५ व्युरो प्रमुख शरण कर्माचार्यले टेलिभिजनमा ग्रामीण क्षेत्रका नागरिकको सक्रिय सहभागिता गराउन सके टेलिभिजन पत्रकारीता बांच्न सक्ने बताउनुभयो । उहांले पत्रपत्रिका भन्दा टेलिभिजनमा काम गर्नु थप चुनौती भए पनि पारिश्रमिक एउटै भएको कारण दक्ष जनशक्तिको अभाव हुंदै गएको बताउनु भयो । काठमाण्डौ बाहिर महिला टेलिभिजन पत्रकारको खडेरी लागेको बताउंदै महिलाहरुको पत्रकारीता बिबाह पछि सकिने गरेको बताउनुभयो ।
लुम्बिनी सामुदायिक टेलिभिजनका महासचिव तथा नेपाल पत्रकार महासंघ रुपन्देहीका उपाध्यक्ष दिनेश पाण्डेले केन्द्रका मिडियाले स्थानीय मुद्दालाई प्राथमिकता दिन नसकेको बताउनुभयो । उहांले काठमाण्डौ बाहिर टेलिभिजन स्थापना गरेर संघीयताको अभ्यास सुरु भएको बताउनुभयो ।
कार्यक्रमको सहजीकरण जनता टेलिभिजनका समाचार प्रमुख रामकुमार एलनले गर्नुभएको थियो ।
नेपालमै पहिलो पटक आयोजना गरिएको समाचार महोत्सव ‘लुम्बिनी न्यूज फेस्टिवल–२०७६, १६बुँदे घोषणा पत्र जारी गर्दै आज सम्पन्न भएको छ । संघीयतामा सञ्चार, समृद्धिका लागि मोफसल नै मूलधार’ भन्ने नाराका साथ लुम्बिनी प्रेस क्लबले लुम्बिनीमा आयोजना गरेको कार्यक्रममा ठूला तथा राष्ट्रिय पत्रिकाका सम्पादकहरु,अग्रज पत्रकार,सञ्चार प्रमुख लगाएत प्रदेश ५ का सबै जिल्ला र देशैभरका अन्य जिल्लाहरुबाट ३ सय बढी सञ्चारकर्मीहरुको सहभागिता रहेको आयोजकले दाबी गरेको छ ।