काठमाडौं, ४ पुस । विपी कोइराला मेमोरियल क्यान्सर अस्पताल‚ भरतपुरका कार्यकारी निर्देशक डा भक्तमान श्रेष्ठको अपहरण प्रकरणका दोषी गौतम योञ्जन पक्राउ परेका छन्।

अपहरण गरेको ९ वर्षपछि उनी पक्राउ परेका हुन्। पुनरावेदन अदालतले उनलाई ५० हजार जरिवानासहित ९ वर्ष कैदको फैसला सुनाएको थियो। योञ्जनलाई महाराजगञ्जबाट केन्द्रीय अनुसन्धान ब्यूरो (सिआइबी) को टोलीले पक्राउ गरेको थियो। उनलाई केन्द्रीय कारागार पठाइएको केन्द्रीय अनुसन्धान ब्यूरोका डिआइजी निरज शाहीले जानकारी दिए। २०६७ जेठ ४ मा भिमसेन पण्डित, रोहित पालिवाल लगायतको समूहले डा। श्रेष्ठको अपहरण गरेको थियो। अपहरणपछि काठमाडौंको विभिन्न ठाउँमा उनलाई बन्धक बनाएर राखिएको थियो।

बन्धक बनाएको १९ दिनपछि भारत, उत्तरप्रदेशको कानपुर नजिकै अपहरणकारीलाई तीन किलो ६ सय ग्राम सुन फिरौती बुझाएपछि उनी छाडिएका थिए। योञ्जनको बुढानिलकण्ठस्थित फार्म हाउसमा पनि श्रेष्ठलाई केही दिन राखिएको अनुसन्धानबाट खुलेको थियो ।