कपिलवस्तु ,   ४ पुस ।  प्रदेश ५ भूमि व्यवस्था कृषि तथा सहकारी मन्त्रालयको अनुदानमा चरम अनियमितता भएको कपिलवस्तुमा पनि भेटिएको छ । सरकारी कर्मचारी,कृषक समूहका अगुवा र सहकारीका केही विचौलियाको सेटिङमा कपिलवस्तुमा पनि कृषि अनुदानमा चरम दुरुपयोग भएको हो ।

कपिलवस्तु नगरपालिका वडा नं २ मा रहेको हृदय कृषक समुहले तरकारी खेतीको लागि आएको अनुदान रकमले जग्गामा तारवार गर्नुको साथै कृषि उपकरणहरु खरिद गरेको छ । गत आर्थिक वर्ष २०७५।०७६ जेठमा कृषि ज्ञान केन्द्रसंग तरकारी खेतिका लागि सम्झौता भएको हो। बोडी लौकी घिरौला भिन्डी लगाएत तरकारी खेती गर्न अनुदान सम्झौता गरिएको थियो । तरकारी लागि सिचाई गर्न बोरीगं जडानका लागि समेत संझौता भएपनि हालसम्म कृषकको खेत बारीमा संझौता गरिए अनुसारका कुनैपनि तरकारी फलेको छैन।

३ विगाह क्षेत्रफल रहेका प्रस्तावित जग्गामा हाल मटर र आलु खेति मात्रै गरिएको छ । सम्झौतामा उल्लेख भएको तरकारी खेति गरिएको छैनन नै । प्राप्त अनुदान पनि सबै खर्च गरिएको छैन । संझौता गर्दा ६ लाख अुनदान लेखिए पनि समुहले ४ लाख ७० हजारको मात्रै किसानले अनुदान पाएको समुहका अगुवाहरुको प्रतिकृया छ । सम्झौता ढिलो भएकोले तरकारी खेतीमा समस्या परेको उनीहरुको भनाई छ ।

यस्तै गरी शिवराज नगरपालिका वडानं ११ सडवामा रहेको नव प्रगतिशिल बहुउद्देश्यीय कृषक समुहको गरेको बाख्रा पालनमा पनि अनुदानको रकम दुरुउपयोग भएको भेटिएको छ ।स्थलगत रुपमा गएर हेर्दा हाल जम्मा ६ वटा बाख्रा समुहको अध्यक्षको घरमा रहेको भेटिएको छ । । बाख्रा पालनको लागि बनाइएको खोर पनि विगत तीन महिनादेखि बन्द रहेको समुहका अध्यक्ष दुर्गा खनाल स्विकार्छन् । प्रदेश सरकार संग ६ लाख अनुदान पाएका समुहले शुरुवाती चरणमा ५६ वटा बाख्र पालेको जानकारी दिएका थिए । बाख्रामा पि पि आर रोग लागेर १७ वटा बाख्रा मरेको र जिउदा १० वटा बाख्रा सस्तो मुल्यमा बिक्री गरेको बताए ।

कृषि अनुदानमा चरम बदमासी भएपछि प्रदेश सभाको कृषि, वन तथा वातावरण समितिले स्थलगत अध्ययन समेत गरेको छ । अध्ययनबाट व्यापक अनियमितता भेटिएको समितिले बताएको छ ।

कपिलवस्तुमा पनि विचौलिया र कर्मचारीको सेटिङमा कृषि अनुदानमा चरम दुरुपयोग भएको छ ।कृषिमा सरकारले व्यवसायीकरण आधुनिकीकरण गर्न भन्दै वर्षेनी कृषि अनुदानमा खर्च गरेको छ । तर, विचौलिया र सरकारी कर्मचारीको सेटिङमा अनुदान हत्याउने गलत प्रवृत्तिले सरकारी योजनालाई हावा खाने पक्का छ ।