चितवन १ मंसिर । माओवादी केन्द्रका अध्यक्ष पुष्पकमल दाहाल प्रचण्डले जनतालाई भ्रमित गर्ने र ठेक्कावट्टा गरेर हिंड्नेहरुले राजनीकिा नेतृत्व गर्न नसक्ने बताएका छन् । चितवनको गीतानगर बजारमा शुक्रबार भएको चुनावी सभालाई सम्बोधन गर्दै अध्यक्ष प्रचण्डले अबको कार्यभार तीब्र आर्थिक विकास र सुशासनमार्फत समृद्धि हासिल गर्ने भएको बताए ।
देशको विकास र जिल्लाको विकास राजनेताले मात्र गर्न सक्ने बताउँदै उनले ठेकेदारहरूबाट देश विकासको कल्पनै गर्न नसकिने बताए । विगतमा आफू पहाड र मदेशको सम्बन्ध सुदृढ गर्न सिराहा गएको स्मरण गर्दै प्रचण्डले यसपटक देशको समृद्धिको सन्देश दिन चितवन आएको बताए ।

पूर्वप्रधानमन्त्री प्रचण्डले विकास र समृद्धिको सुरूवात चितवनबाट सुरू गर्दै विकासको मोडलको रूपमा देशैभरी लागु गर्न आफू चितवन आएको बताए । देश विकासको लागि स्थिर र शक्तिशाली सरकार नै आवश्यक रहेको बताए । एकअर्को प्रसंगमा प्रचण्डले कांग्रेस देश विरोधी र विकास विरोधी रहेको तथ्य बुढीगण्डकी परियोजनाको सम्झौता खारेजी स्पष्ट गरेको दावी गरे । उनले मंसिर २१ पछि बन्ने वामपन्थी सरकारले त्यस्ता निर्वाचन विरोधी र विकास विरोधी निर्णय उल्ट्याइदिने चेतावनी दिए ।

उनले माओवादी केन्द्र र एमालेबीच पार्टी एकता हुँदैन कि भन्ने आशङ्का नगर्न नेता तथा कार्यकर्ताहरूलाई निर्देशन दिए । अध्यक्ष प्रचण्डले स्वर्गीय बीपी कोइराला र गिरिजाप्रसाद कोइरालाको स्मरण गर्दै हलो बोकेर काँग्रेसको सपना साकार नहुने व्यंग्य गरे । लोकतन्त्रमा प्रतिस्पर्धा हुने स्वाभाविक भएको भन्दै प्रचण्डले गणतन्त्रविरोधी हलो बोकेर गणतन्त्रमाथि काँग्रेसले बेइमानी गरेको बताए ।