सिरहा, ९ माघ । जिल्ला प्रहरी कार्यालय सिरहाले सखुवानान्कारकट्टि गाउँपालिका – १ स्थित मौवाही र मधुवनी टोलबाट आज १५ सय लिटर घरेलु मदिरा र प्लास्टिक भाडाकुडा १२ थान बढी कच्चा पदार्थ जफत गरेको छ ।

सिरहा प्रहरी प्रमुख एसपी उमा प्रसाद चतुर्बेदीले अधिकांश घटना मदिराकै कारण हुने गरेको भन्दै मदिराजन्य पदार्थ बिक्री वितरणमा विशेष निगरानी बढाएको बताउनुभयो ।

प्रहरीले शुरु गरेको ‘टोलटोलमा प्रहरी अभियान’ मा विशेषगरी अवैध मदिरा नियन्त्रणलाई प्राथमिकता राखेको एसपी चतुर्बेदीले जानकारी दिनुभयो ।

अवैध घरेलु मदिराको बिक्री वितरणमा कडाई गर्न थालेको प्रहरीले जिल्लाका विभिन्न स्थानबाट पनि ठूलो मात्रामा घरेलु मदिरा जफत गरी नष्ट गरेको थियो । गस्तीका क्रममा बरामद गरिएका मदिरा र कच्चा पदार्थ स्थानीय जनप्रतिनिधि र सञ्चारकर्मीको रोहवरमा नष्ट गर्ने प्रहरीले जनाएको छ । जिल्लाका विभिन्न स्थानमा घरेलु मदिरा खुलेआमरुपमा बिक्री भइरहेको पाइएपछि सिरहा प्रहरीले अभियानकै रुपमा कडाई गरेको हो ।