काठमाडौं । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले जलवायु परिवर्तनका कारण नेपालजस्ता विकासशील मुलुकले बेहोर्नुपरेको क्षतिको क्षतिपूर्ति विकसित देशहरूले दिनुपर्ने बताएका छन्।
सोमबार एमाले केन्द्रीय कार्यालय च्यासलमा एमाले राजधानी प्रदेश कमिटीले रसुवा बाढीपीडितका लागि हस्तान्तरण गरेको १० लाख रुपैयाँको चेक ग्रहण गर्दै ओलीले जलवायुजन्य तथा पर्वतीय विपद्का लागि नेपालजस्ता मुलुक जिम्मेवार नरहेको बताएका हुन्।
ओलीले विकसित मुलुकको औद्योगिकीकरण तथा उत्सर्जनका कारण जलवायु परिवर्तन तीव्र बनेको र त्यसको असर भने नेपालजस्ता मुलुकले बढी भोग्नुपरेको दाबी गरे।
“पछिल्लो समयका पर्वतीय विपद्को कुरामा मानवीय कारणले जे जति भएको छ, त्यसमा नेपालजस्ता देशहरू हामी जिम्मेवार छैनौँ। हाम्रो किञ्चित पनि जिम्मेवारी छैन, विकसित देशहरूको जिम्मेवारी छ,” ओलीले भने।
उनले जलवायु परिवर्तनका कारण प्रभावित मुलुकलाई विकसित राष्ट्रहरूले क्षतिपूर्ति उपलब्ध गराउनुपर्नेमा जोड दिए।
“विकसित देशहरूका कारण मर्कामा पर्ने हामीजस्ता मुलुकलाई उनीहरूले नै क्षतिपूर्ति दिनुपर्छ। हाम्रा कारणले वातावरण विनाश भएका छैनन्, त्यसको क्षति चाहिँ हामीले व्यहोर्नुपर्ने!” उनले भने।
जलवायु क्षतिपूर्तिको मुद्दा उठाउन आग्रह
रसुवाको भोटेकोसी बाढीपछि नेपालले अन्तर्राष्ट्रिय समुदायबाट प्राप्त गरिरहेको राहत तथा सहयोगप्रति ओलीले धन्यवाद व्यक्त गरे।
उनले तत्कालीन राहत र उद्धारसँगै जलवायु परिवर्तनका कारण नेपालले बेहोरेको क्षतिको अन्तर्राष्ट्रिय क्षतिपूर्तिको विषयलाई समेत प्राथमिकताका साथ उठाउनुपर्ने बताए।
नेपालजस्ता हिमाली तथा विकासशील मुलुकले जलवायु परिवर्तनमा न्यून योगदान गरे पनि हिमनदी पग्लने, हिमताल विस्फोट, बाढी, पहिरो तथा अन्य पर्वतीय विपद्को जोखिम भने बढ्दै गएको भन्दै ओलीले अन्तर्राष्ट्रिय मञ्चमा जलवायु न्यायको विषयलाई बलियो रूपमा प्रस्तुत गर्नुपर्ने धारणा राखेका छन्।
Originally published on abcnews.com.np.
प्रतिक्रिया दिनुहोस्