राष्ट्रियसभाको अन्य समूह र महिला सदस्यमा क्रमशः गण्डकी प्रदेशबाट नेकपाका नारायणकाजी श्रेष्ठ र भगवती न्यौपाने निर्वाचित हुनुभएको छ ।

नेकपा प्रवक्ता रहनुभएका श्रेष्ठले तीन हजार ४६२ मत प्राप्त गरी विजयी हुनुभएको हो । उहाँको निकटतम प्रतिद्वन्द्वी नेपाली काँग्रेसका सूर्यप्रसाद रेग्मीले दुई हजार २४४ मत प्राप्त गर्नुभएको छ । यसैगरी न्यौपाने तीन हजार ३६६ मत प्राप्त गरी विजयी हुुनुभएको छ भने उहाँको निकटतम प्रतिद्वन्द्वी काँग्रेसका विमला गौचनले दुई हजार ३४० मत प्राप्त गर्नुभयो । अन्य समूहतर्फ राष्ट्रिय जनमोर्चाका शङ्कर बरालले १९८ मत प्राप्त गर्नुभएको निर्वाचन कार्यालयका प्रमुख महेन्द्र सुवेदीले जानकारी दिनुभयो ।

आज बिहान १० बजेदेखी साँझ ४ बजेसम्म निर्वाचन कार्यालय परिसरमा भएको मतदानमा कूल मतदाता २३० मध्ये २२८ जनाले मतदान गर्नुभएको थियो भने कर्णाली प्रदेशबाट नेकपाका उम्मेदवार मायाप्रसाद शर्मा र सुमित्रा विसी विजयी हुन भएको छ । शर्माले तीनहजार ६१८ र विसीले तीनहजार ६८४ मत प्राप्त गर्नुभएको छ । राष्ट्रिय सभा निर्वाचन अन्तर्गत वागमती प्रदेशमा नेकपाका उम्मेदवार विजयी भएका छन्। बागमति प्रदेशबाट बेदुराम भुसाल ६ हजार ८ सय १० मतभार प्राप्त गर्दै निर्वाचित हुनुभएको छ ।

त्यस्तै महिलातर्फ नेकपाकै गंगा बेलवासे निर्वाचित हुनुभएको छ । उहाले ६ हजार ८ सय २८ मत प्राप्त गर्नुभएको छ । प्रदेश २ मा नेपाल कम्युनिष्ट पार्टी (नेकपा) र राष्ट्रिय जनता पार्टी (राजपा)को गठबन्धनका चारै जना उम्मेदवार विजयी भएका छन् । दुबै दलले २÷२ सिट बाँडेर चुनावमा होमिएका थिए ।

प्रदेश २ बाट महिलातर्फ तुलसा दाहाल, दलित तर्फ राधेश्याम पासवान र अन्यतर्फ मृगेन्द्रकुमार सिंह र अल्पसंख्यकतर्फ शेखरप्रसाद सिंह विजयी हुनुभएको छ । प्रदेश १ बाट नेकपाका गोपी अछामी, इन्दिरा गौतम र देवेन्द्र दाहाल दिर्वाचित हुनुभएको छ । प्रदेश ५ मा नेकपाका उम्मेदवार विमला घिमीरे, जगतप्रसाद शर्मा र गोपा प्रसाद भट्टराइ विजयी हुनुभएको छ । रिक्त १८ पदका लागि आज निर्वाचन भएको हो ।

यसैवीच, राष्ट्रियसभा सदस्यको आज भएको निर्वाचनमा स्थानीय तहतर्फ ९९.१९ प्रतिशत मतदान भएको छ । निर्वाचन आयोगका अनुसार, प्रदेशसभा सदस्यतर्फ भने ९९.१५ प्रतिशत मत खसेको छ । राष्ट्रियसभा सदस्यको १८ पदका लागि आज बिहान १०ः०० देखि अपरान्ह् ४ः०० बजेसम्म मतदान भएको थियो । मतदान शान्तिपूर्ण र उत्साहजनक रुपमा सम्पन्न भएको आयोगले जनाएको छ ।