काठमाडौं, २७ फागुन । प्रहरीसमक्ष आत्मसमर्पण गर्न पुगेका ठेकेदार मनोज भेटवालविरुद्ध प्रहरीले बैंकिङ कसूर मुद्दामा अनुसन्धान अगाडि बढाउने भएको छ ।

त्यसअगाडि प्रहरीले उनलाई उच्च अदालत पाटनमा पेस गर्न लागेको छ । अदालतबाट म्याद थप भएपछि मुद्दामा अनुसन्धान कार्य अगाडि बढाउने प्रहरीको तयारी छ । महानगरीय प्रहरी परिसर काठमाडौंका प्रवक्ता प्रहरी नायव उपरीक्षक होबिन्द्र बोगटीले म्याद थपका लागि आवश्यक प्रक्रिया थालिएको बताउनुभयो । उहाले आज बिहान साढे ८ बजेतिर भेटवाल आफैं प्रहरी कार्यालयमा उपस्थित भएको जानकारी दिनुभयो । भेटवालविरुद्ध चन्द्र तामाङले ७५ लाख ठगी गरेको अभियोगमा किटानी जाहेरी दिएपछि प्रहरीले भेटवालको खोजी थालेको थियो । उनी यसअघि एपेक्स डेभलपमेन्ट बैंकमा भएको डेढ अर्ब रूपैया“ घोटलामा पनि मुछिएका थिए । त्यसपछि नेपाल प्रहरीको केन्द्रीय अनुसन्धान ब्युरो (सिआइबी) ले नियन्त्रणमा लिएको थियो ।

‘क’ वर्गका ठेकेदार भेटवालविरुद्ध पुरानो बसपार्कको जग्गामा भ्युटावर बनाउने भन्दै जग्गा कब्जा गरेको अभियोग लागेको छ । सम्पदा अभियन्ताहरूले भ्युटावर बनाउन नहुने र खुल्ला मञ्चलाई खुल्ला नै राख्नुपर्ने भन्दै आएका छन् । उनी जलेश्वर स्वच्छन्द बिल्डर्सका सञ्चालक हुन् ।