काठमाडौं, २८ फागुन । राष्ट्रिय प्रजातन्त्र पार्टी (राप्रपा) र राष्ट्रिय प्रजातन्त्र पार्टी (राप्रपा) संयुक्तबीच आज एकीकरणको औपचारिक घोषणा हुदैछ ।

राष्ट्रियसभा गृहमा दिउ“सो साढे १२ बजे विशेष कार्यक्रमका बीच एकता घोषणा हुन लागेको राप्रपाका प्रचार विभाग प्रमुख मोहन श्रेष्ठले जानकारी दिनुभयो । शनिबार राति पार्टी एकताको सहमति पत्रमा राप्रपा अध्यक्ष कमल थापा, राप्रपा संयुक्तका डा प्रकाशचन्द्र लोहनी र पशुपति शमशेरले हस्ताक्षर गर्नुभएको थियो । लामो समयको छलफल र वार्तापछि दुइ पार्टीबीच एकता घोषणा हुन लागेको श्रेष्ठले बताउनुभयो ।

घोषणा सभालाई राप्रपाका तीनै जना नेताहरु कमल थापा, डा प्रकाशचन्द्र लोहनी र पशुपति शमशेरले सम्बोधन गर्ने कार्यक्रम छ । २०४७ साल जेठ १५ गते आधिकारीक रुपमा दर्ता भएको राष्ट्रिय प्रजातन्त्र पार्टी बीचमा ५ पटक फुटेको छ भने ४ पटक जुटेको छ । २०७३ मंसिर ६ गते एकता भएको राप्रपा २ वर्ष नपुग्दै २०७४ साउन २२ मा फुटेको थियो । यो दुई वर्षको अन्तरालमा राप्रपा फेरि एक ठाउ“मा आएका छन् । 