बुटवल, २३ चैत । संघिय सरकारको स्वास्थ्य तथा जनसंख्या मन्त्रालयले ७ वटै प्रदेशमा प्रयोगशाला संचालन भएको घोषणा गरेको झण्डै ५ दिन पछि प्रदेश ५ को राजधानी रुपन्देहीमा आइतबार मध्यान्ह देखि कोरोना भाइरस परिक्षण सुरु गरिएको छ । रुपन्देहीको भैरहवा स्थित राष्ट्रिय गुहंबाली अनुसन्धान केन्द्रको हाता भित्र स्थापना गरिएको प्रदेशस्तरीय प्रयोगशालामा कोरोना भाइरसको परीक्षण सुरु भएको हो ।
प्रयोगशालामा आइतबार दिउँसो मात्रै कोरोना जाँच गर्ने मुख्य उपकरण बायोसेफ्टी क्याबिनेटमा एयर सर्कुलेसनको सफल परीक्षण भएपछि परिक्षण सुरु भएको हो । प्रयोगशालाबाट एक घन्टामा एकजना र प्रति दिन १६ जना सम्मको नमूना परीक्षण गर्न सकिने प्रदेश ५ को प्रादेशीक स्वास्थ्य प्रयोगशाला प्रमुख डाक्टर राजेन्द्र गिरीले जानकारी दिनु भयो ।
कोरोना जाँचका लागि स्थापना गरिएको प्रयोगशालामा पोर्टेबल पीसीआर मेसिन संघीय सरकारले उपलब्ध गराएको हो । कोरोना जाँचका लागि रियलटाइम पीसीआर मेसिन मुख्य उपकरण मानीन्छ । प्रयोगशालामा बाहिरी हावा पस्न नसक्ने तथा प्रयोगशालामा कार्यरत प्राविधिकको सुरक्षा र प्रयोग गरिएका नमूनाहरु हानिकारक तत्वबाट जोखिम नहुने गरि बायोसेफ्टी लेबल समेत तयार भएको डाक्टर गिरीले बताउनु भयो ।
संघिय सरकारले पठाएको पीसीआर र किटसहितको सामग्री चैत २० गते बुटवल आईपुगे पनि मेसिन जडान लगायतका सबै काम आज मात्रै सकिएको थियो । कोरोना जांचका लागि राष्ट्रिय जनस्वास्थ्य प्रयोगशाला काठमाडौंका माईक्रोबायोलोजिष्ट बिष्णु रायमाझी, रामबहादुर खड्का र खेमध्वज बस्नेतको टोली आएको छ ।
प्रदेशमा प्रयोगशाला नहुँदा स्वाबहरु संकलन गरी काठमाडौं पठाउनुपर्ने वाध्यता थियो । आज पहलो परिक्षणकारुपमा पाल्पाबाट आएको स्वावको नमुना परिक्षण गरिएको र नेगेटिभ रिपोर्ट आएको प्रयोगशाला श्रोतले जनाएको छ । प्रयोगशाला संचालन भएसंगै आज बांकेबाट २३ वटा नमुना परिक्षणकालागि बुटवल पठाईएको स्वास्थ्य कार्यालय बांकेका फोकलपर्सन नरेश श्रेष्ठले जानकारी दिनुभयो ।
यो बाहेक प्रदेश ५ सरकारले दाङ र नेपालगन्जमा पनि प्रयोगशाला स्थापना गर्दैछ । तर त्यहाँ भने संचालनमा आउन केही दिन लाग्ने छ ।
रुपन्देहीमा प्रयोगशाला स्थापना भएपछि रुपन्देहीसँगै कपिलवस्तु, पश्चिम नवलपरासी, पाल्पा, अर्घाखाँची र गुल्मी जिल्लाका कोरोना शंकास्पद बिरामीको स्वाब परीक्षण र रिपोर्ट छिटो आइ उपचार सहज हुने अपेक्षा गरिएको छ ।