बुटवल, ४ बैशाख । बिगत १५ दिनदेखि नेपाल भारत सिमाको दशगजा नजिकैको क्वारेन्टेनमा राखिएकाहरुमा शिघ्र परिक्षण विधि आरटी र्यापिड डाइग्नोस्टिकबाट कोरोना नेगेटिभ देखिएपछि पनि केन्द्र सरकारले घर जान प्रतिबन्ध लगाए पछि उनीहरुतोडफोडमा उत्रिएकाछन् । क्वारेन्टेनको ब्यवस्थापन हेरिरहेको नेपालगन्ज उपमहानगर पालिकाले उनीहरुलाई सम्वन्धित जिल्लामा पठाउने तयारी गरिरहँदा गृह मन्त्रालयले तत्काल घर फिर्ता नगर्न भनेपछि गाडीमा चढेकालाई पनि ओरालिएको थियो । बस चढिसकेकालाई समेत उतारिएपछि उनीहरुले कम्तीमा ३ वटा बसमा तोडफोड गरि सिसा फुटाईदिएकाछन् । ।
घर जान नपाएको आक्रोशमा उनीहरुले गाडी तोडफोड गरेका हुन् । बाँके प्रहरीका अनुसार तीन वटा गाडीमा तोडफोड भएको छ । प्रमुख जिल्ला अधिकारी कुमार बहादुर खड्काले गृह मन्त्रालयबाट तत्काल पठाउन नमिल्ने जवाफ आएपछि उनीहरुलाई घर पठाउने निर्णय स्थगित गरिएको थियो ।
बांकेका प्रमुख जिल्ला अधिकारी कै सक्रियतामा बस ब्यवस्था गरिएको तर सिडिओ आफैले पठाउन नसकिने भनेपछि उनीहरु आक्रोशमा आएको नेपालगन्ज उप महानगर पालिकाकी उप प्रमुख उमा थापाले बताउनु भयो । सिडीओले गृहसंग समन्वय नगरेका कारण समस्या आएको थापाले बताउनु भयो ।
१५ दिन क्वारेन्टाइनमा बसेका उनीहरुलाई घर फिर्ता गर्न प्रमुख जिल्ला अधिकारी कुमार बहादुर खडकाको पहलमा उपमहानगरपालिकाले ६ वटा गाडीको व्यवस्था गरेको थियो । भारतका विभिन्न सहरबाट आएका २६ जिल्लाका १ सय ८१ जना दशगजा क्वारेन्टाइमा बसेका छन् ।