पाल्पा , ८ असार ।  बुटवलबाट रिडीतर्फ जाँदै गरेका ४ सवारी साधन पहिरोमा पुरिएका छन्। बुटवल –गुल्मी सडक अन्तर्गत पाल्पाको तानसेन नगरपालिका–११ मा गएको पहिरोमा गाडी पुरिएका हुन्।

गएराती परेको झरीले पहिरो गएपछि उक्त स्थानमा सडक अवरूद्ध भएको थियो। अवरूद्ध सडकमा सवारी साधन रोकेर पहिरो हटाइरहेका बेला सोमबार दिउँसो अचानक सवारी साधन रोकिएकै स्थानबाट पहिरो खस्दा एक ट्रक, एक ट्यांकर, एक कार र एक मोटरसाइकल पुरिएको प्रहरीले जनाएको छ ।

घटनास्थलका प्रत्यक्षदशीका अनुसार ट्यांकर ३०० मिटर तल खोंचमा पुगेको छ भने ट्रक २० मिटर तल पुरिएको अवस्थामा छ कार र मोटरसाइकले माटोले पुरिएका छन्। घटनास्थलबाट ३ जनाको उद्धार गरिएको र कम्तिमा २ जनाको मृत्यु भएको प्रहरीले बताएको छ। उद्दारकार्यमा नेपाल प्रहरी सशस्त्र प्रहरी र नेपाली सेनाको टोली खटिएको छ ।