काठमाडौं, २८ असार । मिडियासँग सम्बद्ध सरोकारवालाहरुले विज्ञापन रहित क्लिन फिड नीति आगामी श्रावण १ गतेदेखि नै लागु गर्न सरकारको ध्यानाकर्षण गराएका छन् ।

नेपाल मिडिया सोसाइटी, सामुदायिक रेडियो प्रसारक संघ अक्युराव, ब्रोडकाष्टिंग एशोशिएशन अफ नेपाल (बान) र नेपाल विज्ञापन संघले आइतबार संयुक्त रुपमा ज्ञापनपत्र बुझाउँदै विदेशी च्यानललाई विज्ञापनरहित गर्दै आयात निरूत्साहित गरेर नेपालको व्यापार घाटा कम गर्न र उत्पादनशील क्षेत्रलाई लागत प्रतिस्पर्धी बनाउन क्लिन फिड महत्वपूर्ण कदम हुने भन्दै क्लिन फिडको नीति आगामी २०७७ साउन १ गतेदेखि नै लागु गराउन सरकारसँग माग गरेको छ ।

क्लिन फिड देश र जनताको हितमा रहेको विज्ञप्तीमा उल्लेख गरिएको छ । स्वदेशी उत्पादन र उद्योगलाई समेत यो नीतिले सहयोग र विस्तारका लागि प्रवर्धन गर्ने बताउँदै यो नीति कसैविरुद्ध लक्षित नभएर नेपालका सबै व्यवसायी, नेपाल सरकार र जनताका पक्षमा केन्द्रित र सार्वभौम तथा राष्ट्रवादी मान्यता रहेको विज्ञप्तीमा जनाइएको छ ।

पछिल्लो समय भारतीय मिडियाले नेपालप्रति दुष्प्रचार गरिरहेको भन्दै यस्ता प्रचारले दुई देशका जनताबीचको आपसी सद्भावमा प्रतिकुल प्रभाव पार्ने भएकोले क्लिनफिड लागु भए यस्ता दुस्प्रचार रोकिने पनि जनाइएको छ ।