काठमाडौं, १२ साउन ।  कुमसुमखोला आगलागी पीडित चेपाङ परिवारले खाद्यान्नभन्दा बास सबैभन्दा पहिलो आवश्यकता भएको छ ।

चितवन राष्ट्रिय निकुञ्ज प्रशसानले चितवनको माडी कुसुमखोलामा बस्दैआएका चेपाङको १० वटा घर जलाएपछि उनीहरूमा वर्षातको समयमा गासको भन्दापनि वासको अभावले सताएको हो ।

घर जलेपछि राहतमा दिइएको दाल चामल समेत राख्ने ठाउँ नभएको पीडित जगराम चेपाङले बताउनुभयो । पानी परेको छ ओत लाग्ने ठाँउ छैन दिएको राहत कहाँ राख्ने उहाँले भन्नुभयो ( ‘सानो त्रिपाल छ त्यसले पानी ओत्दैन, सामग्री जोगाउन समस्या छ ।’

‘घर जल्यो, बस्ने ठाँउ छैन पकाउने भाडा, सुत्ने ओछ्यान परिवार कहाँ बस्ने दिएको चामल सबै भिज्छ त्यसलाई कसरी जोगाउने ’ उहाले दुखेसो पोख्नुभयो । दुइवटा घर जले १० वटा घर भत्के सबै आउछन् केही दिन्छन् जान्छन् तर राख्ने ठाँउ छैन । घर निर्माण गर्ने भनेर गएका छन् काम भएको छैन । हिउँदमा भए जहाँ बसेपनि फरक पर्दैन वर्षामा पानी परेर बिजोग भएको छ कसरी अवस्था सुनाउने ? ’ पालिका सदस्यसमेत रहन भएका जगरामले भन्नुभयो ।

चेपाङ अगुवा संविधान सभा सदस्य गोविन्दराम चेपाङले भन्नुभयो, ‘खाने सामग्री जुटाउला मेहनत गरेर खाउला तर बास नै नभए कहाँ राख्ने रु हामीलाई अहिले दाल चामल लिएर कुसुमखोला गएको भन्दा बासको व्यवस्था गरेको सबैभन्दा ठुलो राहत मिल्छ ।’

अहिले राहत दिने भन्दै पीडितको भत्केको घर गएका छन् तर सुरक्षित स्थानमा घर निर्माणको लागि ठोस कार्यक्रम गएको छैन गोविन्दरामले भन्नुभयो । यस्तो अवस्था आउन दिन हुँदैन निकुञ्जबाट हामी पीडित भएका छौँ । हाम्रो पीडालाई राहतको महसुस सम्बन्धित निकायले गर्नुपर्छ ।उहाँले भन्नुभयो ।

माडी नगरपालिकाका प्रमुख ठाकुर ढकालले भन्नुभयो ‘आगजनी भएका र घर भत्केकाहरूको बासको व्यवस्था पालिकाले गर्नेछ । हामीले उपयुक्त स्थानको छनौट गरिराखेका छौँ । केही दिन भित्र स्थान पक्का भएपछि घर निर्माणको कार्य सुरु हुनेछ । एक परिवारलाई दुईकोठा भएको टिनको छानो लगाएर घर निर्माण गर्ने तयारीमा छौँ । अहिले पानी परेकाले काम गर्न समस्या भएको छ । पानी पर्न रोकिएपछि त्यसलाई पूर्णता दिनेछौँ ।